मुख्यमंत्री सहायता निधीसाठी मदत करा ः कुलगुरू

नवीन नांदेड, ः स्वामी रामानंद तीर्थ मराठवाडा विद्यापीठाशी संलग्नित सर्व महाविद्यालये, विद्यापीठ परिसर आणि उपपरिसरातील सर्व शैक्षणिक संकुल, न्यू मॉडेल डिग्री कॉलेज, हिंगोली आणि कै. श्री उत्तमराव राठोड आदिवासी विकास व संशोधन केंद्र, किनवट येथील प्राचार्य, प्राध्यापक, शिक्षकेतर अधिकारी आणि कर्मचारी यांनी ‘कोरोना’ (कोव्हिड-१९) विरुद्धच्या लढाईसाठी एक दिवसाचे वेतन मदतीच्या स्वरूपात मुख्यमंत्री सहायता निधीसाठी द्यावे, असे आवाहन विद्यापीठाचे कुलगुरू डॉ. उद्धव भोसले यांनी रविवारी (ता. २९) केले.

एक दिवसाचे वेतन
आपला देश आणि राज्य सध्या कोव्हिड-१९ कोरोना व्हायरसच्या अत्यंत गंभीर अशा संकटातून जात आहे. भारत सरकार आणि महाराष्ट्र शासन कोरोना व्हायरसचा प्रकोप रोखण्याकरिता प्रयत्नशील आहेत. देशातील प्रत्येक नागरिकाचे कर्तव्य आहे, की आपण आपल्या देशासाठी काहीतरी केले पाहिजे. या भावनेतून आपण सर्वांनी मिळून आपले एक दिवसाचे वेतन मुख्यमंत्री सहायता निधीकरिता द्यावे.

संपर्क ठेवतांना संसर्ग न होण्याची काळजी घ्या
विद्यापीठाने सुरवातीपासूनच स्वच्छतेसंदर्भात विविध उपाययोजना केल्या असून व्हायरसचा प्रकोप एका व्यक्तीकडून दुसऱ्या व्यक्तीद्वारे पसरू नये म्हणून शासनाच्या निर्देशनानुसार प्राचार्य, प्राध्यापक, संशोधक यांनी घरी राहून (वर्क फ्रॉम होम) विभागाचे कामकाज करावयाचे कळविले आहे. कोरोना विषाणूचा संसर्ग होऊ नये म्हणून त्यांनी नागरिकांना आवाहन केले.

हेही वाचा -  सावधान, नांदेड शहरात प्लॅस्टिकचा भस्मासुर वाढतोय

वारंवार साबण व पाणी वापरून आपले हात स्वच्छ धुवा, शिंकताना व खोकलतांना आपल्या नाकावर व तोंडावर रुमाल किंवा टिश्यू पेपर धरा, इतरांपासून किमान एक मीटर दूर राहा, डॉक्टरांच्या सल्ल्यानुसार उपचार घ्या, फळे, भाज्या न धुता खाऊ नका, तसेच श्वसन संस्थेचे विकार असणाऱ्या व्यक्तीशी संपर्क ठेवतांना संसर्ग न होण्याची काळजी घ्या, असे आवाहन केले. विद्यापीठ अनुदान आयोगाच्या निर्देशानुसार विद्यापीठ प्रशासनाने संलग्नित महाविद्यालयाच्या प्राचार्यांना कळविले आहे.