हिंगोली ब्रेकींग : खड्ड्यात कार कोसळून चार शिक्षक ठार; सेनगांवजवळ अपघात

सेनगाव ( जिल्हा हिंगोली ) : सेनगावजवळ राज्य रस्त्यावरील पुलाच्या कामासाठी करण्यात आलेल्या खड्ड्यात कार कोसळून पडल्याने पाण्यात बुडून चौघांचा दुर्दैवी मृत्यू झाल्याची घटना रविवारी (ता. १३) रात्री आकरा वाजताच्या सुमारास घडली आहे. हे चौघे शिक्षक असल्याची समोर आली आहे.

लोणार तालुक्यातील अंकूश गायकवाड, त्र्यंबक थोरवे रा. पळसखेड, जि. बुलढाणा, विजय ठाकरे, गजानन सानप रा. खळेगांव ता. लोणार, अशी या मृतांची नावे आहेत. चौघेही शिक्षक असून शाळा सुरु होणार असल्यामुळे ते आपल्या मुलांना शाळेत प्रवेश घेण्यासाठी नांदेड येथून आले असल्याची प्राथमिक माहिती समोर आली आहे.

हेही वाचा - ज्यो बायडेन आणि व्लादिमीर पुतिन यांची 16 जून रोजी भेट होणार आहे

सेनगाव ते जिंतुर राज्य महामार्गाचे काम सुरु आहे. सेनगाव जवळच पुलाचे बांधकाम सुरु आहे. या कामासाठी मोठा खड्डे तयार केले आहेत. याच खड्ड्यात रविवारी रात्री स्विफ्ट कार (एम एच २८ ऐ झेड ११२०) कार पडली. खड्ड्यातील पाण्यामध्ये कार उलटी झाली. ही कार पूर्णपणे लॉक असल्यामुळे. कारमधील कोणालाही बाहेर निघता आले नाही. अन त्यातच गुदमरुन त्यांचा दुर्दैवी मृत्यू झाला. दरम्यान या ठिकाणी वाहनाचा मोठा आवाज आल्याने परिसरातील नागरिकांनी घटनास्थळी जाऊन पाहिल्यानंतर त्यांनी तात्काळ ही माहिती पोलिसांना दिली. यानंतर सेनगावच्या सहाय्यक पोलिस निरीक्षक दीक्षा लोकडे, उपनिरीक्षक अभयकुमार माकने, हवालदार अनिल भारती, श्री. शिदे यांच्या पथकाने घटनास्थळी जाऊन गावकऱ्यांच्या मदतीने वाहनातील चारही मृतदेह बाहेर काढले. सदर मृतदेह सेनगावच्या ग्रामीण रुग्णालयात दाखल केले आहेत. या मध्ये दोन मृतदेहाच्या खिशात आधार कार्ड मिळाल्यामुळे हे चौघे लोणार तालुक्यातील असल्याची माहिती पोलिसांना मिळाली. त्यावरुन त्यांच्या लोणार येथील कुटुंबियांशी संपर्क साधला.

येथे क्लिक करा - सोशल मिडियावर सध्या हा चर्चेचा विषय असून ही अंडी 10 व्या शतकातील असल्याचा दावा केला जातोय.

दरम्यान, जिंतुर ते फाळेगांव या राज्य महामार्गाचे काम गेल्या अनेक दिवसांपासून सुरु आहे. या कामाच्या ठिकाणी कुठल्याही प्रकाराचे फलक लावण्यात आले नसल्यामुळे वाहन चालकांना रस्त्याचा अंदाज लागत नाही. यामुळे या ठिकाणी अनेक अपघाताच्या घटना घडल्या आहेत. मात्र संबंधित गुत्तेदाराकडून निष्क्रियता दिसून येत आहे. त्यामुळे हा अपघात झाल्याचा आरोप परिसरातील नागरीकांतून केला जात आहे.

संपादन- प्रल्हाद कांबळे