Hingoli Rain News : हिंगोली जिल्ह्यात रिमझिमच; मागील चोवीस तासांत १.४० मिलिमीटर पावसाची नोंद

हिंगोली : जिल्ह्यात सलग दुसऱ्या शुक्रवारी (ता. १५) रिमझिम पाऊस झाला. मागील चोवीस तासांत शुक्रवारी सकाळी आठ वाजेपर्यंत १.४० मिलिमीटर पावसाची नोंद झाली. आतापर्यंत जिल्ह्यात ७३.५८ टक्के पाऊस झाला आहे.

जिल्ह्यात तालुकानिहाय शुक्रवारी सकाळी आठ वाजेपर्यंत झालेला पाऊस असा ः हिंगोली १.१० मिलिमीटर, कळमनुरी ३.९० मिलिमीटर तर वसमत,औंढा व सेनगाव येथे भुरभुर पाऊस झाला. जिल्ह्यात मागील महिन्यात पावसाने वीस ते पंचवीस दिवसांची ओढ दिली होती. यामुळे पिकांची परिस्थिती नाजूक झाली होती.

दरम्यान, सप्टेंबर महिन्यात अधूनमधून पाऊस सुरू झाल्याने पिकांना दिलासा मिळाला आहे. दरम्यान, गुरुवारी हिंगोली, कळमनुरी तालुक्यात हलक्या स्वरूपाचा पाऊस झाला. वसमत, औंढा व सेनगाव येथे पावसाची भुरभुर होती.

दरम्यान, शुक्रवारी हिंगोली शहरात सकाळी सहा वाजता भुरभुर पाऊस झाला. त्या नंतर दिवसभरात अधूनमधून पावसाची रिमझिम सुरू होती. तसेच कळमनुरी, वसमत, औंढा व सेनगाव तालुक्यातील काही गावांत रिमझिम पाऊस झाला. दिवसभर ढगाळ वातावरण असल्याने सूर्यदर्शन देखील झाले नाही.