Hingoli : राज्यस्तरीय कबड्डी स्पर्धेची जय्यत तयारी

हिंगोली : येथील रामलीला मैदानावर वसुंधरा फाउंडेशनच्या वतीने तीनदिवसीय राज्यस्तरीय कबड्डी स्पर्धेचे आयोजन केले आहे. रविवारी (ता. चार) संयोजन समितीच्या वतीने मैदान साफसफाई, लाल माती टाकणे, प्रेक्षक गॅलरी आदी कामाची युद्धपातळीवर तयारी सुरू आहे.

वसुंधरा फाउंडेशनच्या वतीने येथील एका रामलीला मैदानावर दहा डिसेंबर ते १३ डिसेंबर या कालावधीत राज्यस्तरीय कबड्डीचा महासंग्राम हिंगोलीकराना पाहावयास मिळणार आहे. एक डिसेंबरला मैदानाचे पूजन मान्यवरांच्या हस्ते झाले. त्यानंतर शनिवारी रन फॉर कबड्डीचा कार्यक्रम पार पडला. आता क्रीडाप्रेमींना राज्यस्तरीय कबड्डी स्पर्धेची उत्सुकता लागली आहे. दरम्यान, संयोजन समितीचे समन्वयक कल्याण देशमुख यांच्या मार्गदर्शनाखाली मैदान समितीचे प्रमुख विशाल शिंदे, सत्यप्रकाश नांदापूरकर, विकास जाधव, मधुकर सुतार, दिगंबर पारिसकर, संजू महाराज सरदार यांच्याकडून कबड्डी मैदान तयार करण्याची जोरदार तयारी सुरू आहे.

याचप्रमाणे बारा थर असलेली गॅलरी उभारण्याचे काम, लाल माती आणून ती साफ करण्याचे कामही सुरू आहे. त्यानंतर संपूर्ण मैदानाची साफसफाई करून, पार्किंग व्यवस्था, स्टेज तयार करणे आदी कामे सुरू आहेत. या स्पर्धेत ग्रामीण भागातील दहा तर शहरी भागातील दोन असे एकूण बारा संघ तर राज्यातून पंधरा संघ सहभागी होणार आहेत.