हिंगोलीत सार्वजनिक दसरा महोत्सवाचे बासा पूजन

हिंगोली : म्हैसूरच्या दसऱ्यानंतर हिंगोली येथील दसरा (Dasara In Hingoli) सर्वदूर प्रसिद्ध आहे. येथे नवरात्रात दहा दिवस रामलीला, नव्हान पारायण आदी धार्मिक कार्यक्रम असतात व रावण दहनाचा कार्यक्रम, फटाक्यांची आतषबाजी प्रसिद्ध आहे. मात्र मागच्या वर्षीपासून कोरोनाचे सावट असल्याने हे सर्व कार्यक्रम रद्द करून खाकी बाबा मठात छोटेखानी कार्यक्रम होत आहेत. या वर्षी देखील येथेच कार्यक्रम होणार आहेत. रविवारी (ता.१९) सकाळी अकरा वाजता बासापुजन कार्यक्रम झाला. शहरातील खाकी बाबा मठ संस्थान येथे आज सकाळी सार्वजनिक दसरा महोत्सव समितीच्या बासा पुजनाचा (Basa Pujan) कार्यक्रम धार्मिक विधीवत पुजाअर्चा करून करण्यात आला. यावेळी महंत कौशल्यदास महाराज, उपविभागीय अधिकारी उमाकांत पारधी, प्रभारी तहसीलदार संदीप राजपुरे, नगराध्यक्ष बाबाराव बांगर, तलाठी प्रदीप इंगोले, वकील संघाचे जिल्हाध्यक्ष अॅड.पतंगे, शाम खंडेलवाल, बाबा घुगे, मनोज शर्मा, नर्सींगराव नायक, श्री.गोळेगावकर, गोविंद सारस्वत दौलत बनसोडे, गोविंद गिरी आदींची उपस्थिती होती.

शहरातील प्रसिद्ध असलेल्या सार्वजनिक दसरा महोत्सव समिती दरवर्षी रामलीला मैदानात हे कार्यक्रम होतात. दसरा महोत्सवाला औद्योगिक प्रदर्शनाची जोड दिली जाते. येथे विविध स्टाॅल्स व बच्चे कंपनीसाठी खेळाचे साहित्य उभारले जाते. यात मिक्की माऊस, ड्रॅगन ट्रेन, गगनचुंबी आकाश पाळणे आदी तसेच मनोरंजनासाठी देखील विविध स्टाॅल्स उभारण्यात येतात. मात्र हे सर्व कार्यक्रम कोरोना संकटाने बंद झाले आहेत. शिवाय रामलीला मैदानावर आता उद्यान उभारले आहे. त्यामुळे येथे होणार सर्वच कार्यक्रम रद्द करण्यात आले आहेत. मागच्या वर्षी प्रमाणे दसरा महोत्सवाचे सर्व धार्मिक कार्यक्रम खाकी बाबा मठात होणार आहेत.