Parbhani Crime : अल्पवयीन मुलासोबत अनैसर्गिक कृत्य, वसतिगृह चालकावर गुन्हा नोंद ; परभणीतील घटना

परभणी : वसतिगृहात शिक्षण घेणाऱ्या अल्पवयीन मुलावर त्याच वसतिगृह चालकाने अनैसर्गिक अत्याचार केल्याची घटना उघडकीस आली आहे. या प्रकरणी सदरील वसतिगृह चालकावर कोतवाली पोलिस ठाण्यात ता. २६ जानेवारी रोजी गुन्हा नोंद करण्यात आला आहे.

परभणी शहरातील पेडगाव रोड परिसरात सुदर्शन भांबळे हा सह्याद्री निवासी गुरुकुल नावाचे वसतिगृह चालवितो. वसतिगृहातील आठवीच्या वर्गात शिकणाऱ्या एका विद्यार्थ्यासोबत आरोपी सुदर्शन भांबळे याने डिसेंबर २०२३ मध्ये अनैसर्गिक कृत्य केले. पीडित मुलाने ही गोष्ट भीतीपोटी कोणाला सांगितली नाही.

काही दिवसांपूर्वी शाळेला सुट्टी असल्याने पीडित मुलगा गावी गेला होता. सुट्ट्या संपल्यावर तो परभणीला येण्यासाठी घाबरत होता. पीडित मुलाच्या आईने मुलाला विचारले असता त्याने पूर्ण प्रसंग आईला सांगितला. पीडित विद्यार्थ्याचे वडील आणि काका या दोघांनी सह्याद्री वसतिगृहात येवून जाब विचारला असता सुदर्शन भांबळे याने या दोघांनाही मारहाण केल्याचे मुलांच्या वडिलांनी पोलिसांना सांगितले.

या प्रकरणी पीडित मुलाच्या वडिलांनी वसतिगृह चालक सुदर्शन भांबळे याच्याविरुद्ध ता. २६ जानेवारी रोजी गुन्हा दाखल केला. सदरील गुन्ह्याचा तपास कोतवाली पोलिस ठाण्याचे सहाय्यक पोलिस निरीक्षक दिनेश मुळे करत आहेत. या प्रकरणातील आरोपी सुदर्शन भांबळे हा सध्या फरार असल्याची माहिती मुळे यांनी दिली.