Motivational Story : रहायला हक्काचं घर नाही, अन्नपाण्यावाचूनही हाल; अश्या स्थितीतही प्रशांतची शाळा शिकण्यासाठी झुंज

धाराशिवः आजीनं बनविलेला वरण-भात, तो नसेल तर रात्रीचं शिळं असेल ते गरम करून खायचं, गणवेश अंगावर चढवायचा अन् रस्त्यावर येऊन धाराशिवकडं जाणाऱ्या दुचाकीचालकांना हात दाखवत उभं रहायचं. .एखाद्याला दया येऊन त्याने धाराशिवला सोडलं, तर त्याच दिवशी शाळेत जायचं अन्यथा घरी बसायचं, अशा खडतर, हलाखीच्या परिस्थितीशी रोज झुंज द्यायची, तरीही शाळेत जायची धडपड नाही सोडायची, हे संघर्षमय प्रेरणादायी जगणं आहे एका दुसरीतील मुलाचं. प्रशांत शिंदे त्याचं नाव.धाराशिव शहरानजीकच्या हातलाई देवी परिसरात बार्शी रस्त्याच्या कडेला पत्र्याच्या शेडमध्ये राहणारं एक पारधी समाजातील कुटुंब. प्रशांत त्यातीलच एक. त्याला एक लहान भाऊदेखील आहे. आजी (आईची आई) कसातरी त्यांचा सांभाळ करते. .मामा-मामी, त्यांची लेकरं असं मोठं कुटुंब पत्र्याच्या शेडमध्ये हलाखीत जीवन जगत आहे. त्यामुळे या कुटुंबासमोर आज इथं तर उद्या कुठं? असा प्रश्न आ वासून समोर उभा आहे. अशा परिस्थितीतही प्रशांत शाळा शिकण्याचा प्रयत्न करीत आहे. मात्र, परिस्थिती त्याच्यासमोर अडचणींचा डोंगर उभा करीत आहे.शाळेचे वाहन हातलाई देवीच्या अलीकडूनच विद्यार्थ्यांना घेऊन येते, असे प्रशांत शिकत असलेल्या शरद पवार प्राथमिक, माध्यमिक, उच्च माध्यमिक विद्यालयाच्या मुख्याध्यापकांनी सांगितले.....तरीही त्याने मानलेली नाही हारप्रशांत रोज सकाळी रस्त्यावर येऊन उभा राहतो व दुचाकीचालकांना हात दाखवितो. कुणी गाडी थांबवून धाराशिवमध्ये सोडलं, तर आनंदानं शाळेत जातो. पुन्हा घरी परत येताना हाच संघर्ष. शहरातील बार्शी नाक्याजवळील शरद पवार प्राथमिक, माध्यमिक, उच्च माध्यमिक विद्यालय ही त्याची शाळा. शाळेचे वाहन आहे, परंतु ते प्रशांतला आणत नाही. अलीकडूनच अन्य विद्यार्थ्यांना घेऊन हे वाहन येते. शाळेनं एक गणवेश आणि वर्ग शिक्षिकेनं एक पुस्तक दिलयं. त्यावरच त्याचा अभ्यास. प्रशांतची अशी वेदनादायी कहाणी, पण तरीही त्याचा संघर्ष सुरूच आहे. त्याने हार मानलेली नाही. शिकण्याची जिद्द तो बाळगून आहे. फक्त त्याला गरज आहे एका ‘लिफ्ट’ची..कितीबी हाल झालं, तरी मला शाळा शिकायची हाय. पण काय करू, कुणी नाही सोडलं की शाळा बुडती. आठवड्यातून दोन-तीन दिवसंच शाळत जायला मिळतं, बाकी दिस घरीच अभ्यास करत बसतू.— प्रशांत शिंदेमी या लेकरांचं मिळल तसं भागवते. त्यांच्या मामाचीही मदत होते. तो चालक हाय ट्रकवर. त्यालाबी पगार देत न्हाईत येळेवर. खाण्या-पिण्याचे लय हाल हायतं. त्यात शेड हटवा म्हणून इरिगेशनची नोटीस येतीया. कधी घराबाहेर काढतील काय सांगता येत नाही. पण, तरीबी प्रशांतला शाळा लावणार. त्याला लयं आवड हाय शाळंची. त्याची तेवडी सोय झाली म्हंजी लय बरं व्हईल.— किरण काळे, प्रशांतच्या आजी.सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.

Motivational Story : रहायला हक्काचं घर नाही, अन्नपाण्यावाचूनही हाल; अश्या स्थितीतही प्रशांतची शाळा शिकण्यासाठी झुंज

Related Stories

Municipal School Condition : जर्जर इमारती अन् अपुरे शिक्षक! महापालिका शाळांची ‘सकाळ’कडून पाहणी; सुरक्षिततेचा प्रश्न ऐरणीवर