धक्कादायक! लग्नानंतर हळद फिटण्यापूर्वीच तरुणाने केली आत्महत्या

जळकोट (लातूर): येथे आठ दिवसांपूर्वी लग्न झालेल्या एका तरुणाने गळफास घेऊन आत्महत्या केली. ही घटना गुरुवारी (ता. १२) सकाळी उघडकीस आली. शुभम रामलिंग मठपती (वय २७) असे मृताचे नाव आहे. हळद फिटण्यापूर्वीच शुभमने जगाचा निरोप घेतल्याने त्याच्या नववधूसह कुटुंबावर शोककळा पसरली आहे. लग्नानंतरची पहिली नागपंचमी असल्याने शुभमची पत्नी माहेरी गेली होती. गुरुवारी सकाळी त्याला झोपेतून उठविण्याचा त्याचा मोठा भाऊ प्रदीप हा त्याच्या खोलीकडे गेला. पण, शुभम खोलीत दिसला नाही. त्यामुळे त्याने आजूबाजूला पाहिले. दरम्यान, शुभमने गळफास घेतल्याचे त्याला दिसले. या धक्क्याने प्रदीप चक्कर येऊन जाग्यावर कोसळला. दरम्यान, कुटुंबातील इतर सदस्यांनी धाव घेतली अन् एकच टाहो फोडला. ज्या घरातून आठ दिवसांपूर्वी वाजत्रींचे मंगल सूर ऐकू येत होते त्याच घरातून दुःखाचा आकांत ऐकला मिळाला. या घटनेमुळे परिसरात हळहळ व्यक्त केली जात आहे.

कर्जामुळे उचलले टोकाचे पाऊल?

शुभमची शहरातच पानटपरी आहे. शिवाय त्याच्या नावे दोन एकर शेती आहे. लॉकडाउनमुळे त्याचा पानटपरीचा व्यवसाय मधल्या काही काळात ठप्प झाला होता. दरम्यान, त्याने शेतीसाठी जिल्हा मध्यवर्ती बँकेचे कर्ज घेतले होते. त्यातच आता पावसाने उघडीप दिल्याने पीक कोमेजत होते. त्यामुळे शुभमने व्यथित होऊन आत्महत्या केली असावी, असा अंदाज व्यक्त केला जात आहे.

लिहिली दोन पानांची चिठ्ठी

शुभमने आत्महत्येपूर्वी लिहिलेली दोन पानांची चिठ्ठी सापडली. आपल्या मृत्यूशी आई, वडील, भाऊ आणि मित्र अशा कुणाचा संबंध नसल्याचा आशय आहे. दरम्यान, बुधवारी रात्री त्याने देशमुख वाड्यासमोरील लिंबाच्या झाड्याखालील ओट्यावर बसून मित्रांशी गप्पा केल्या होत्या. त्या मित्रांचा त्याने चिठ्ठीत उल्लेख करून आभार मानले.