...अन्‌ लंकाबाईने दिला 21 व्या बाळाला जन्म, लगेच हाती घेतला कोयता!  

माजलगाव (जि. बीड) - शहराच्या बाजूलाच पालावर राहून संसाराचा गाडा हाकणाऱ्या लंकाबाईची एकविसाव्यांदा प्रसूती झाली. नववा महिना सुरू असताना ऊसतोडणीसाठी कर्नाटक राज्यात प्रवास करताना लंकाबाई ट्रॅक्‍टरमध्येच बाळंत झाल्या; मात्र दोन दिवसांच्या प्रवासात धक्के बसल्याने अर्भक मृत झालेले होते. विशेष म्हणजे प्रसूतीनंतर तिसऱ्याच दिवशी लंकाबाईने फडात ऊसतोडणीचे काम सुरू केले.

 
शहरापासून पाच किलोमीटर अंतरावर मालोजी देवराव खरात सहा महिने भंगार वेचून, तर सहा महिने ऊसतोड करीत संसाराचा गाडा हाकत आहेत. त्यांची चाळीस वर्षांची पत्नी लंकाबाई यांची यापूर्वी वीस वेळा प्रसूती झाल्या असून, त्यातील नऊ अपत्ये प्रसूतीनंतर दगावली आहेत. विशेष म्हणजे यातील एकही प्रसूती सरकारी रुग्णालयात झाली नाही. सद्यःस्थितीत नऊ मुली, दोन मुले असताना लंकाबाई 21 व्यांदा गर्भवती राहिल्या.

हेही वाचा :  आजारपण आल्यावर नको धावाधाव : जाणून घ्या आरोग्य योजना

दोन महिन्यांपूर्वी ही बाब माध्यमातून समोर आल्यानंतर आरोग्य विभागाने दाखल घेत त्यांची तपासणी केली. अनेक प्रसूती झाल्यामुळे गर्भपिशवी नाजूक झाल्यामुळे रुग्णालयात भरती होण्याचा सल्ला डॉक्‍टरांनी दिला होता; परंतु काम केल्याशिवाय चूल पेटत नसल्याने लंकाबाईंनी त्यास नकार दिला. नववा महिना सुरू असताना दहा दिवसांपूर्वी त्या ट्रॅक्‍टरमधून कर्नाटक राज्यातील शंकेश्‍वर कारखान्याला ऊसतोडणीसाठी जात होत्या.

हेही वाचा : video - मनुष्यालाच नव्हे तर चक्क कुत्रे, मांजरांनाही होतो मधुमेह  

प्रवासातच त्यांना कळा सुरू होऊन ट्रॅक्‍टरमध्येच प्रसूती झाली. दोन दिवसांच्या ट्रॅक्‍टरच्या प्रवासात धक्के बसल्याने अर्भकाचा गर्भातच मृत्यू झालेला होता. लंकाबाईला मृत बाळाचाच चेहरा पाहावा लागला. पोटाची आग शमविण्यासाठी लंकाबाईने रस्त्याच्या कडेलाच अर्भकाचे अंत्यसंस्कार करून तिसऱ्या दिवशीच हातात कोयता घेतला. ही माहिती लंकाबाईने सामाजिक कार्यकर्त्या सत्यभामा सौंदरमल यांना दूरध्वनीवरून दिली. 

हेही वाचा : video : अरेच्चा ! कोंबडीशिवाय जन्मतात पिले !  

सर्वसामान्यांच्या आरोग्याची काळजी घेण्यासाठी राज्य शासन कोट्यवधींचा निधी खर्च करीत असले, तरी त्या विभागात काम करणाऱ्या अधिकाऱ्यांचे मात्र पालावर राहून भटकंती करणाऱ्या कुटुंबांकडे दुर्लक्ष असते. यामुळेच लंकाबाईसारख्या महिलांना आरोग्य सुविधा मिळत नाहीत. 
- सत्यभामा सौंदरमल, सामाजिक कार्यकर्त्या