मोठा अवैध शस्त्रसाठा जप्त, नांदेड पोलिसांची कारवाई 

नांदेड : पोलिस अधिक्षक विजयकुमार मगर यांच्या विशेष पथकानी नगिना घाट परिसरातील एका दुकानावर छापा टाकला. यावेळी पोलिसांनी अवैध शस्त्रसाठा जप्त केला. ही कारवाई गुरूवारी (ता. १९) रोजी सांयकाळी केली. पोलिसांनी दुकानचालक रणजीतसिंग सरदार याला अटक केली. 

शहराच्या नंदीग्राम सोसायटीमध्ये राहणारा रणजीतसिंग रामसिंग सरदार (वय ३५) याचे नगिना घाट परिसरात दुकान आहे. या दुकानात अवैधरित्या तलवारी, खंजर, गुप्ती, कुकरी आदी शस्त्र साठा बेकायदेशीरपणे विक्री करत असल्याची गुप्त माहिती पोलिसांना मिळाली. यावरून पोलिस अधिक्षक विजयकुमार मगर, अतिरिक्त पोलिस अधीक्षक दत्ताराम राठोड, विजय पवार आणि पोलिस निरीक्षक साहेबराव नरवाडे यांच्या मार्गदर्शनाखाली विशेष पथकाचे सहाय्यक पोलिस ज्ञानोबा देवकते यांनी आपले सहकारी देवा चव्हाण, श्रीराम दासरे, राजीव बोधगीरे, हेमंत कांबळे, शेख इसराईल, राजेंद्र ठाकरे आणि राजकुमार कोडगीरे यांना सोबत घेऊन रणजीतसिंग सरदार याच्या दुकानावर कारवाई केली. 

हेही वाचा--अपहरण केलेला बाळ दिसताच आईचा हंबरडा

४१ हजाराचा मुद्देमाल जप्त 

यावेळी दुकानातून २५ तलवारी, सहा खंजर, चार गुप्ती, पाच कुकरी असा अंदाजे ४१ हजार ३०० रुपयाचा मुद्देमाल जप्त केला. यावेळी पोलिसांनी रणजीतसिंग सरदार याला ताब्यात घेऊन वजिराबाद पोलिस ठाण्यात हजर केले. एपीआय ज्ञानोबा देवकते यांच्या फिर्यादीवरुन वजिराबाद पोलिसांनी रणजीतसिंग सरदार याच्याविरुध्द भारतीय हत्यार कायद्यान्वये गुन्हा दाखल केला आहे. तपास वजिराबाद पोलिस करीत आहेत. 

दुकानदारांना आवाहन

नगिनाघाट व गुरूद्वारा परिसरातील परवानाधारक दुकानदारांनी आपल्या दुकानात विनापरवाना घातक शस्त्र विक्रीसाठी ठेवु नये. या परिसरातील अनेक दुकानांची अचानक तपासणी करण्यात येणार असून पोलिसांच्या रोषास बळी पडु नका. आपणास ज्या वस्तु विक्री करण्याचा परवाना आहे त्याच वस्तु आपल्या दुकानात ठेवावे. तसेच घातक शस्त्र आढळून आल्यास आपल्याविरुध्द कडक कारवाई करण्यात येईल. या घातक शस्त्रामुळे शहरातील व जिल्ह्यातील कायदा व सुव्यवस्था बाधीत होण्याची शक्यता नाकारता येत नाही. त्यामुळे दुकानदारांनी आपल्या दुकानात अशी शस्त्र ठेवू नये.
विजयकुमार मगर, पोलिस अधीक्षक, नांदेड.