Latur Rain News : पानचिंचोली मंडळाला अवकाळी पावसाने झोडपले; पिकांचे नुकसान

निलंगा: तालुक्यातील पानचिंचोली व निटूर महसूल मंडळात मंगळवारी ता. २८ रोजी जोरदार अवकाळी पाऊस झाला आहे. शिवाय वादळी वारे व पावसामुळे ऊस, रब्बी ज्वार, तूर ही पीके आडवी झाली असून सर्वाधिक फटका पानचिंचोली व निटूर महसूल मंडळात बसला आहे. पानचिंचोली मंडळात एका तासात ७४ मिलीमीटर पावसाची नोंद झाली आहे.

पाऊस पडणार म्हणून गेल्या कांही दिवसापासून हवामान विभाग अंदाज वर्तवत होते. दिवसभर उन्हाची तिव्रता व सायंकाळी ढगाळ वातावरण असल्याने रात्री विजेच्या कडकडाटासह जोरदार पाऊस झाला तालुक्यातील निटूर, हाडगा, उमरगा, मसलगा , तुपडी, गौर, कलांडी यासह आदी भागात हा अवकाळी पाऊस झाला आहे.

तर मदनसुरी,कासार शिरसी, कासार बालकुंदा, हलगरा, औरादशहाजनी, भुतमुगळी,निलंगा या मंडळात रिमझिम पाऊस झाला आहे. या पावसामुळे हरभरा, गहू, करडई, ज्वारी या रब्बी पिकांना जीवदान मिळाले आहे.

तालुक्यातील पानचिंचोली या मंडळात सर्वाधिक ७४ मिलिमीटर पावसाची नोंद झाली आहे.तर त्यापाठोपाठ निटूर मंडळात २० मिलिमीटर पाऊस झाला आहे. मात्र तालुक्यातील इतर मंडळात अतिशय कमी पर्जन्यमान झाले आहे.

त्यात मदनसुरी-०५,कासार शिरसी ०८ ,कासार बालकुंदा०७,हलगरा-०७ शहाजनी-०४,भुतमुगळी-०३,निलंगा -०६,अंबुलगा १३ मिलिमीटर पावसाची नोंद झाली आहे.त्यामुळे या मंडळातील रब्बी पिकासाठी चांगल्या पावसाची गरज आहे.