Maratha Reservation: मराठा तरुणाचा विष प्राशन करून आत्महत्येचा प्रयत्न, चिठ्ठीत उघड केले 'कारण'

Maratha Reservation: बदनापूर (जिल्हा जालना): मराठा आरक्षण मिळत नसल्याने नैराश्यात आलेल्या गोकुळवाडी (ता. बदनापूर) येथील युवकाने आपल्या राहत्या घरी रविवारी (ता. २९) रात्री विषारी औषध प्राशन करून आत्महत्या करण्याचा प्रयत्न केला. या संदर्भात त्याने लिहून ठेवलेल्या चिठ्ठीत तसा उल्लेख देखील केला आहे.

निखिल पंडित गाडेकर (वय २२) असे आत्महत्येचा प्रयत्न करणाऱ्या युवकाचे नाव आहे. त्याचा व्यवसाय शेती असून त्यावरच त्यांच्या कुटुंबाचा उदरनिर्वाह चालतो. मराठा समाज सामाजिक आणि आर्थिकदृष्ट्या मागासलेला असल्यामुळे समाजाला आरक्षणाची नितांत आवश्यकता आहे, मराठा समाजाला आरक्षण मिळत नसल्यामुळे आपण टोकाचे पाऊल उचलत असल्याचे त्याने औषध प्राशन करण्यापूर्वी चिठ्ठीत लिहून ठेवले होते.

दरम्यान, हा प्रकार लक्षात येताच कुटुंबीय आणि ग्रामस्थांनी तातडीने त्यास प्रारंभी बदनापूर येथील ग्रामीण रुग्णालयात दाखल केले. मात्र डॉक्टरांनी त्यास छत्रपती संभाजीनगर येथे हलविण्याचा सल्ला दिला. दरम्यान, त्यास खासगी वाहनाने उपचारासाठी छत्रपती संभाजीनगर येथे रवाना करण्यात आले आहे. सुदैवाने त्याची प्रकृती स्थिर असल्याची माहिती ग्रामस्थांनी दिली. (Latest Marathi News)