Marathwada : दसऱ्याच्या मुहूर्तासाठी बाजारपेठ सज्ज

जालना : विजयादशमी अर्थात दसऱ्याचा पूर्ण मुहूर्त साधण्यासाठी नववस्तू, सोने,चांदी आणि कपडे खरेदीसाठी बाजारपेठ सज्ज झाली आहे. दुसरीकडे नवरात्रोत्सवाची विविध धार्मिक कार्यक्रमांनी सांगता दिसून येत आहे. दुर्गा देवीची पूजा नवमीची विशेष पूजा,कुलाचार करण्यात भाविक व्यस्त दिसून येत आहे. बुधवारी (ता.५ ) विजयादशमी, धम्म चक्र प्रवर्तन दिन, राष्ट्रीय स्वयंसेवक संघाचे पथसंचलन विविध कार्यक्रमांचे आयोजन करण्यात येत आहे.

शहर व जिल्ह्यात नवरात्रोत्सवाचा उत्साह शिगेला पोहोचला आहे. देवी आणि बालाजी मंदिरात मंगळवारी ( ता.४) नवमीच्या दिवशी विविध धार्मिक कार्यक्रमांत भाविकांची मोठी गर्दी दिसून आली आहे. शहरातील दुर्गा देवी,मंमादेवी,काळुंका माता,तुळजाभवानी मंदिरात महिलांची गर्दी दिसून आली. नवमीच्या दिवशी कुलधर्म ,कुलाचारासह धार्मिक कार्यक्रमाचा घरोघरी उत्साह दिसून आला. दुसरीकडे साडेतीन मुहूर्तांपैकी एक असलेल्या दसऱ्यासाठी बाजारपेठेत गर्दी दिसून येत आहे.

शहरातील कपडा बाजार,सराफा बाजार आणि दुचाकी,चारचाकी वाहन खरेदीसाठी नागरिकांची गर्दी दिसून येत आहे. शहरातील शिवाजी महाराज पुतळा परिसर,गांधी चमन,शनिमंदिर, सतकर कॉम्प्लेक्स परिसरात दुकानावर नागरिकांची वस्तु खरेदीसाठी गर्दी दिसून येत आहे. बाजारपेठेत कापड दुकानांमध्ये ग्राहकांची वर्दळ दिसून येत आहे. महिला साड्यांसह लहान मुलांचे रेडिमेड कपडे खरेदी करण्यात नागरिक पसंती देत आहे.

झेंडू फुलांचा बाजार

शहरातील गांधी चमन, शनिमंदिर, अंबड चौफुली,भोकरदन नाका परिसर,मस्तगड परिसर, शिवाजी महाराज पुतळा परिसरात खेड्यातील शेतकरी मोठ्या प्रमाणावर झेंडूची फुले विक्रीसाठी आणले आहेत.शहरात ठिकठिकाणी झेंडू फुले,ऊस आणि आपट्याची पानेही विक्रीसाठी मोठ्या प्रमाणावर दिसून येत आहे.

खरेदीला पसंती

शहरातील बाजारपेठेत नागरिक वॉशींग मशीन,फ्रीज, मायक्रोव्हेव, ज्युसर, मोबाईल, संगणक, लॅपटॉप, स्मार्ट टीव्ही यासारख्या वस्तु खरेदीचा कल दिसून येत आहे.

चारचाकी वाहनांसाठी वेटिंग

शहरात दुचाकी गाडी खरेदीकडे नागरिकांचा कल मोठ्या प्रमाणावर दिसून येत आहे.दुसरीकडे गेल्या दोन महिन्यांपासून ब्रेझा सह इतर कंपनीच्या चारचाकी गाडी बुकिंग करण्यात आले आहे. परंतु दसऱ्याला अनेकांना गाडी मिळणार नसल्याचे दुकानचालकांनी सांगितले. दोन महिन्यांपासून आम्ही चारचाकी गाडी बुक केली आहे,परंतु अजूनही गाडी मिळाली नसल्याचे ग्राहक अरुणकुमार लांडगे यांनी सांगितले.