लोहारा (जि. धाराशिव) - लोहारा तालुक्यातील मोघा शिवारात नंदीपाटी ते धानुरी रस्त्यावर सुरू असलेल्या पवनचक्की प्रकल्पावर पाच जणांच्या टोळक्याने काठी व दगडांनी हल्ला करत मोठा गोंधळ घातला..या हल्ल्यात पवनचक्कीचे चार कामगार गंभीर जखमी झाले असून, प्रकल्पस्थळी उभ्या असलेल्या वाहनांची तोडफोड करून मोठे आर्थिक नुकसान करण्यात आले. याप्रकरणी लोहारा पोलिस ठाण्यात गुरूवारी (ता. ३१) पाच जणांविरूध्द गुन्हा दाखल करण्यात आला आहे. या घटनेने परिसरात खळबळ उडाली आहे..नंदीपाटी ते धानुरी रस्त्यालगत गट क्रमांक १७० व १७१ मधील शेतजमिनीवर 'टाटा पावर रिनेव्हेबल एनर्जी या खासगी कंपनीकडून पवनचक्की प्रकल्प उभारला जात आहे. या ठिकाणी नेहमीप्रमाणे बुधवारी (ता. ३०) सायंकाळी सहा ते सातच्या दरम्यान काम सुरू असताना, अचानक अजित मुसांडे, शंकर मुसांडे, सूरज साळुंके, नरहरी बाबर (सर्व रा. धानुरी) आणि विशाल कर्ण जमादार-माळी (रा. लोहारा खुर्द) या पाच जणांनी घटनास्थळी येऊन गोंधळ घालत काम थांबवून 'तुम्हाला आमच्या भागात काम करायचे असेल, तर आम्हाला पैसे द्यावे लागतील,' असे सांगत त्यांनी कामगारांना धमकावले..त्यानंतर शिवीगाळ करत, जीवे मारण्याचा प्रयत्न केला. यावेळी त्यांनी विशाल विश्वनाथ पांचाळ (वय-३७, रा. कलबुर्गी, कर्नाटक, सध्या रा. उमरगा) यांच्यासह त्यांच्या चार सहकाऱ्यांवर काठ्यांनी व दगडांनी हल्ला चढवला. या हिंसक हल्ल्यात विरेंद्र महेंद्र सिंग, सुब्राशीस शरदचंद्र नाईक, श्रीकांतकुमार पानीग्रही आणि परमेश्वर रामदास सूर्यवंशी हे गंभीर जखमी झाले असून, त्यांच्यावर सध्या उमरगा येथील रुग्णालयात उपचार सुरू आहेत..दरम्यान, आरोपींनी घटनास्थळी उभ्या असलेल्या कंपनीच्या वाहने, साधने यांच्यावर दगडफेक करून मोठे नुकसानही केले. ही घटना घडल्यानंतर काही वेळ प्रकल्पस्थळी भीतीचे वातावरण निर्माण झाले होते.या प्रकरणी विशाल पांचाळ यांच्या फिर्यादीवरून लोहारा पोलिसांनी संबंधित पाच आरोपींविरुद्ध गंभीर स्वरूपाचे गुन्हे दाखल केले आहेत. पोलिसांनी भारतीय दंड संहितेच्या विविध कलमांन्वये गुन्हा नोंदवला आहे. या प्रकरणाचा पुढील तपास सहायक पोलिस निरीक्षक ज्ञानेश्वर कुकलारे यांच्या मार्गदर्शनाखाली उपनिरीक्षक सचिन केंद्रे करत आहेत..सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
