नांदेडकरांनो....उघडा डोळे, व्हा गंभीर!

नांदेड - कोरोनाच्या पार्श्‍वभूमीवर नागरिकांनी घरी राहण्याचे आवाहन जिल्हा प्रशासनासह पोलिस विभागाने केले असले तरी अनेकजण सकाळी आणि संध्याकाळी घराबाहेर येऊन विनाकारण गर्दी करत असल्याचे काही भागात चित्र आहे. जगभरात पसरत चाललेल्या कोरोनाने आता नांदेड जिल्ह्यालगत असलेल्या हिंगोलीपर्यंत प्रवास केला आहे. त्यामुळे आता सावध आणि दक्ष राहण्याची वेळ आली आहे. 

जगभरात कोरोना रुग्णांची संख्या दिवसेंदिवस वाढत चालली आहे. त्यामुळे त्या त्या ठिकाणचे प्रशासन प्रतिबंधात्मक उपाययोजना करत आहे. संचारबंदी लॉकडाऊन असल्यामुळे घराबाहेर पडू नका, असे सांगितले आहे. तरी देखील काहीजण अजूनही घराबाहेर विनाकारण आल्याचे दिसून येत आहे. घरपोच किराणा आणि भाजीपाला देण्याचे जाहीर करण्यात आले असून तसे महापालिकेने नियोजनही केले आहे. तरी देखील नागरिक किराणा दुकानावर तसेच भाजीपाला बाजारात गर्दी करताना दिसून येत आहेत.

हेही वाचा - नांदेडला पालकमंत्र्यांसह प्रशासन कामात व्यस्त...

सोशल डिस्टन्सिंगचे नियम पाळा
पहाटे फिरायला जाणाऱ्यांची संख्याही काही ठिकाणी दिसून येत आहे. पूर्णा रस्त्यावर सकाळच्या वेळी भरणारा भाजीपाला बाजारात नागरिकांची गर्दी होत आहे. पूर्णा रोडवरील भाजीपाला बाजारात तर सोशल डिस्टन्सिंगचे सर्रास उल्लंघन करताना दिसून येत आहे. त्या ठिकाणी कोणतेही सोशल डिस्टन्सिंगचे नियम पाळले जाताना दिसून येत नाहीत. नागरिकांसह विक्रेते देखील जवळजवळ भाजीपाला घेऊन विक्रीला बसले आहेत. याबाबत पोलिसांनी देखील सांगितले तरीही त्याकडे दुर्लक्ष होत आहे. भाजीपाला विक्रेत्यासोबतच नागरिकांनी देखील शिस्त लावण्याची गरज आहे.

हे ही वाचलेच पाहिजे - ‘ते’ चौदाजन विशेष निगरानीखाली

सूचनांचे पालन करा
शासनाने जमावबंदी आणि संचारबंदी लागू केली असून त्याचे काटेकोरपणे पालन करण्यात यावे, असे आदेश दिले आहेत. तरी देखील नांदेड शहरातील काही भागात त्यांचे उल्लंघन होताना दिसून येत आहे. अनेकजण ही बाब गांभीर्याने घेण्यास तयार नाहीत. सकाळपासूनच लोक रस्त्यावर बिनधास्त फिरताना दिसत आहेत. विशेष करुन शहरातील अंतर्गत रस्त्यावर अजूनही गर्दी दिसून येत आहे. पोलिसांनी कारवाई करुन सुद्धा काही महाभागांचा रस्त्यावरचा वावर कमी झालेला नाही. त्यामुळे आता याबाबत जिल्हा आणि पोलिस प्रशासनाने कडक कारवाई करण्याचा इशारा दिला आहे.