बीड : वृद्धेचे तलावात रॉकेल व काडीपेटी घेऊन ठाण

शिरूर कासार : संपादीत जमिनीचा मावेजा मिळावा म्हणून प्रशासनाचे उंबरठे झिजवूनही कार्यवाही होत नसल्याने वृद्धेने रॉकेलचे कॅन आणि काडीपेटीसोबत घेऊन तलावात ठाण मांडले आहे. तालुक्यातील टाकळवाडी येथील मुक्ताबाई कोल्हे सकाळपासून त्यांच्या संपादीत जमिनीत झालेल्या तलावात बसून आहेत. 

तालुक्यातील टाकळवाडी येथील गाव तलावात मुक्ताबाई तुकाराम कोल्हे (वय 65) यांची जमिन तलावासाठी संपादीत करण्यात आली. संपादीत जमिनीपैकी काही जमिनीचा मावेजा भेटला असून काही राहीला आहे. मावेजा मिळावा म्हणून त्यांनी प्रशासन दरबारी प्रयत्न केले. मात्र, यश आले नाही. त्यांनी संपादीत जमिनीचा मावेजा भेटला नाही तर 31 मार्चला आत्मदहनाचा इशारा दिला होता. त्यानुसार त्या रविवारी सकाळ पासून तलावात बसून आहेत. सोबत त्यांनी रॉकेलचे कॅन आणि काडीपेटीही ठेवली आहे. अद्याप त्यांच्याकडे कोणीही फिरकले नाही.