रक्तदान शिबिर घेऊ नका

उस्मानाबाद : जिल्ह्यात रक्ताचा तुटवडा नाही. त्यामुळे शिबिर घेऊन गर्दी करू नये, असे आवाहन जिल्हा शल्यचिकित्सक डॉ. राजाभाऊ गलांडे यांनी केले आहे. सर्वांनी घरातच राहावे, विनाकारण गर्दी करू नये, कोरोना विषाणूशी लढण्यासाठी सर्वांनी सहकार्य करावे, असेही त्यांनी पुढे म्हटले आहे.

कोरोना विषाणूचा प्रादुर्भाव वाढू नये, यासाठी सर्वच पातळीवर दक्षता घेतली जात आहे. त्यातच आता रक्ताचा तुटवडा असल्याची चर्चा होत असून त्यासाठी जिल्हाभरात रक्तदान शिबिराचे आयोजन करण्याचे नियोजन केले जात आहे.

हेही वाचा - ‘सकाळ’मुळे आई-मुलाची झाली भेट

दरम्यान, रक्तदान शिबिर घेत असताना गर्दी होते. त्यामुळे कोरोना विषाणूचा प्रादुर्भाव तत्काळ होऊ शकतो. सध्या सर्वांना सोशल डिस्टन्स पाळण्याचे आवाहन केले जात आहे. त्यामुळे शिबिर घेऊन गर्दी करू नये, असे आवाहन आरोग्य विभागाकडून केले जात आहे. वास्तविक रक्तदान हे सर्वश्रेष्ठ दान आहे. अनेक गरजू रुग्णांना रक्ताची गरज असते.

रक्तदान केल्याने दात्याच्या शरीरात तेवढेच रक्त पुन्हा जमा होते. त्यामुळे रक्तदान करणे गरजेचे असल्याचे डॉक्टर्स सांगतात. मात्र सध्या कोरोनाचा फैलाव मोठ्या प्रमाणात होत आहे. त्यामुळे प्रत्येकाने घरात बसणे गरजेचे आहे. शासनाने त्यासाठी लॉकडाऊन केले आहे. शिवाय संचारबंदीही लागू आहे. मात्र काहीजण रक्ताची गरज असल्याचे सांगून रक्तदान शिबिर घेत असल्याचे दिसून येत आहे. 

रक्ताचा तुटवडा नाहीच 
सध्या जिल्ह्यात पुरेसा रक्तसाठा आहे. याशिवाय जिल्ह्यात कुठेही रक्ताचा तुटवडा नाही. तसेच वरिष्ठ स्तरावरही रक्ताची गरज संपली असल्याचे सांगितले आहे. त्यामुळे कोणीही रक्तापासून वंचित राहणार नाही. सध्या आपल्यावर कोरोनाचे संकट आहे. या संकटाशी सर्वांनी मोठ्या धैर्याने तोंड देणे गरजेचे आहे. त्यामुळे सामाजिक संस्थांनी रक्तदान शिबिर घेऊन गर्दी करणे गरजेचे नसल्याचे आरोग्य प्रशासनाकडून सांगण्यात आले आहे. 

रक्तदान हे नेहमीच चांगले असते. मात्र सध्या कोरोना विषाणूशी सर्वांना लढा द्यायचा आहे. सध्या रक्ताचा तुटवडा नसून सर्वांनी घरातच बसण्याची गरज आहे. त्यासाठी प्रत्येकाने काळजी घ्यावी. घरात बसून प्रशासनाला सहकार्य करावे. 
- राजाभाऊ गलांडे, जिल्हा शल्यचिकित्सक, उस्मानाबाद