परजिल्ह्यातून येणाऱ्यांचा ओघ सुरूच

केसरजवळगा (जि. उस्मानाबाद) : जिल्हाबंदी असतानाही परजिल्ह्यातून गावाकडे येणाऱ्या कामगारांचा ओघ सुरूच आहे. आतापर्यंत आलूर (ता. उमरगा) प्राथमिक आरोग्य केंद्राअंतर्गत येणाऱ्या १७ गावांत दोन हजार १५९ नागरिक आले आहेत. तर विदेशातून सहाजण आले आहेत. ५१ नागरिकांना इन्स्टिट्युशनल क्वारंटाइन, तर उर्वरित नागरिकांना होम क्वारंटाइन करण्यात आले आहे. होम क्वारंटाइन केलेल्या ६२ नागरिकांचा १४ दिवसांचा कालावधी पूर्ण झाला असून, पाच जणांचे स्वॅब अहवालही प्राप्त झाले आहेत. ते सर्व निगेटिव्ह असल्याचे वैद्यकीय अधिकाऱ्यांनी सांगितले.

मुंबई, पुणे, सोलापूर, सांगली, नाशिक, नवी मुंबई, ठाणे, पिंपरी-चिंचवड आदी शहरांत काम करणारे अनेक कामगार कामधंदा नसल्याने गावाकडे परतले आहेत. काही जण परवानगी काढून, तर काही चोरट्या मार्गाने गावात दाखल झाले आहेत. परजिल्ह्यातून आलेल्या व्यक्तींची माहिती आरोग्य विभाग व पोलिस प्रशासनाला दिली जाते आहे.

हेही वाचा - हिंगोलीकरांच्या उडाल्या झोपा, कशामुळे? ते वाचाच

आलूर प्राथमिक आरोग्य केंद्राचे वैद्यकीय अधिकारी डॉ. महेश बेंबळगे यांनी परजिल्ह्यातून १७ गावांत दोन हजार १५९ नागरिक आले असून, सहा जण विदेशातून आले असल्याचे सांगितले. यापैकी पाच जणांचे स्वॕब तपासणीसाठी पाठविण्यात आले होते. सर्वांचे अहवाल प्राप्त झाले असून, ते निगेटिव्ह आहेत.

सध्या ४१ जणांना होम क्वारंटाइन करण्यात आले आहे, तर ५१ जणांना इन्स्टिट्युशनल क्वारंटाइन करण्यात आले आहे. पूर्वी क्वारंटाइन असलेल्या ६२ जणांचा १४ दिवसांचा कालावधी पूर्ण झाला असून, त्यांना घरी सोडण्यात आले आहे. नागरिकांनी घरीच राहावे, सरकारच्या नियमांचे पालन करावे, गावात नवीन व्यक्ती आली असेल तर त्याची माहिती तत्काळ आरोग्य विभाग आणि पोलिस प्रशासनाला द्यावी, असे आवाहन केले जात आहे. 

येथे क्लिक करा -  धक्कादायक...! हिंगोलीत एकाच दिवशी सहाजणांचे अहवाल पॉझिटिव्ह

यासंदर्भात मुरूम पोलिस ठाण्याचे सहायक पोलिस निरीक्षक यशवंत बारवकर यांनी परजिल्ह्यातून आलेल्या लोकांची माहिती लपवून ठेवल्याचे आढळून आल्यास संबंधितासह त्यांच्या नातेवाइकाविरुद्ध कारवाई केली जाईल, असा इशारा दिला. परजिल्ह्यातून आलेल्या व्यक्तींची माहिती आरोग्य व पोलिस प्रशासनाला तत्काळ द्यावी, असे आवाहन त्यांनी केले.