फुलांची उधळण करीत मानले पोलिसांचे आभार

कळंब (जि. उस्मानाबाद) : कोरोनाच्या पार्श्‍वभूमीवर टाळेबंदीला ४४ दिवस पूर्ण झाले आहेत. या काळात पोलिस प्रशासनाने यशस्वीरीत्या परिस्थिती हाताळली. यादरम्यान कायदा आणि सुव्यवस्था राखण्याचे काम पोलिसांनी चोखपणे बजावले.

जिल्हाधिकारी दीपा मुधोळ मुंडे यांनी रविवारी (ता. तीन) जनता कर्फ्यू लागू केला होता. या पार्श्‍वभूमीवर पोलिसांनी शहरातून पथसंचलन केले. पोलिस पथकांचे संचलन करीत असताना शहरातील विविध भागांत नागरिकांनी सामाजिक अंतर ठेवत त्यांच्यावर फुलांची उधळण केली व टाळ्या वाजवून स्वागत केले.

कोरोनाचा संसर्ग रोखण्यासाठी टाळेबंदी करण्यात आली आहे. टाळेबंदीची अंमलबजावणी करण्यासाठी पोलिस, महसूल आणि आरोग्य विभाग सतर्क असल्याने तालुक्‍यात कुठेही गालबोट लागले नाही. प्रशासनाच्या आवाहनाला नागरिकांचा मोठा प्रतिसाद लाभल्याने हे शक्‍य झाल्याचे प्रशासनाकडून सांगण्यात येत आहे.

महाराष्ट्रातील इतर बातम्या बाचण्यासाठी - क्लिक करा

जिल्ह्यात कुठेही कोरोना संशयित नसल्याने जिल्ह्याचा ग्रीन झोनमध्ये समावेश झाला आहे. त्यामुळे टाळेबंदी उठणार का नाही, याबाबत नागरिकांत चर्चेला उधाण आले होते. दरम्यान, जिल्हाधिकाऱ्यांनी संपूर्ण जिल्ह्यात जनता कर्फ्यूचे आवाहन केले होते. कळंब तालुक्‍यातील नागरिकांनी प्रशासनाच्या आवाहनाला प्रतिसाद दिला. जनता कर्फ्यूच्या पार्श्‍वभूमीवर पोलिसांनी शहरातून पथसंचलन केले.

शहरातील नागरिकांनी ठिकठिकाणी टाळ्या वाजवून आणि फुलांचा वर्षाव करून पोलिसांचे स्वागत केले. कोरोनाचा प्रादुर्भाव पसरू नये यासाठी नगरपालिका, पोलिस, महसूल आणि आरोग्य प्रशासन रात्रंदिवस उपाययोजना करीत आहेत. या उपाययोजनेचा भाग म्हणून पोलिसांनी शहरातील मुख्य मार्गासह विविध मार्गावरून पथसंचलन केले. देवी रोड, बागवान चौक, डॉ. बाबासाहेब आंबेडकर चौक, छत्रपती शिवाजी महाराज चौकातून पोलिस ठाण्यापर्यंत पोलिस दलाने पथसंचलन केले. यावेळी पोलिसांवर लोकांनी फुलांचा वर्षाव केला, तर लोकांनी टाळ्या वाजवून स्वागत केले.

औरंगाबादच्या इतर बातम्या वाचण्यासाठी - क्लिक करा

उपविभागीय पोलिस अधिकारी सुरेश पाटील, पोलिस निरीक्षक तानाजी दराडे, सहायक पोलिस निरीक्षक चैनसिंग गुसिंगे, श्री. पवार, अतुल पाटील, पोलिस कर्मचारी श्री. हांगे, श्री. पठाण, श्री. जाधव, गणेश वाघमोडे, श्री. शेवाळे, जे. सी. माने आदी पोलिस कर्मचारी उपस्थित होते.