बोचऱ्या थंडीने उस्मानाबादकर गारठले

उस्मानाबाद : जिल्ह्यात दोन दिवसांपासून थंडीचा कडाका वाढला आहे. यंदाच्या हिवाळ्यातील सर्वात नीचांकी 10.9 अंश सेल्सिअस तापमान रविवारी (ता. 29) नोंदले गेले. सकाळी वाहणाऱ्या वाऱ्यामुळे थंडीत आणखीनच भर पडली. बोचऱ्या थंडीमुळे नागरिक त्रस्त झाले आहेत. 

थंडीचा कडाका वाढला 
जिल्ह्यात यंदाच्या हिवाळ्यातही डिसेंबरच्या तिसऱ्या आठवड्यापासून ढगाळ वातावरण निर्माण होत आहे. ढगाळ वातावरणामुळे थंडी गायब झाल्याची स्थिती होती. या वातावरणाचा फटका हरभरा आणि ज्वारी पिकांना बसत आहे. या पिकांवर अळ्यांचा मोठ्या प्रमाणात प्रादुर्भाव झाला आहे. सध्याही अशीच स्थिती असली तरी दोन दिवसांपासून थंडीचा कडाका जाणवण्यास सुरवात झाली आहे. शनिवारी (ता. 28) रात्रीपासून बोचऱ्या थंडीला तोंड देण्याची वेळ नागरिकांवर आली आहे. रविवारी पहाटेपासून थंडीमध्ये मोठ्या प्रमाणात वाढ झाली आहे. वारे सुरू असल्याने थंडीचा कडाका मोठ्या प्रमाणात जाणवत आहे. रविवारी दिवसभर अशीच परिस्थिती होती. 

हेही वाचा : क्राईम सिरियल पाहून जुन्या प्रियकराने काढला काटा 

थंडीपासून बचावासाठी अनेकजण सकाळी उन्हाची ऊब घेतानाचे चित्र दिसून आले. मात्र काहीवेळ ढगाळ वातावरण आणि काहीवेळ ऊन अशी परिस्थिती अनुभवावी लागत आहे. त्यातच वाऱ्यामुळे थंडीमध्ये आणखी भर पडत असल्यामुळे लहान मुले, ज्येष्ठ नागरिक घराबाहेर न पडणेच पसंत करीत आहेत. रविवारी सुटी असल्यामुळे सकाळी आणि सायंकाळी सातनंतर शहरातील अनेक रस्त्यांवरील वर्दळ कमी झाल्याची परिस्थिती होती. पहाटेपासूनच हुडहुडी भरणारे वारे असल्याने थंडीचा कडाका वाढला आहे. दिवसभर अशीच परिस्थिती होती. त्यामुळे सध्या जिल्हा गारठला असल्याचे चित्र आहे. 
यंदा पावसाळ्याच्या शेवटच्या टप्प्यात दमदार पाऊस झाला. सध्या शेतकरी पिकांना पाणी देत आहेत. अनेक ठिकाणी नदी-नाल्यांना पाणी आहे. त्यातच वारे वाहत असल्यामुळे थंडीमध्ये वाढ होत असल्याचे काही जाणकार सांगत आहेत. रविवारी कमाल 25.1 आणि किमान 10.9 अंश सेल्सिअस तापमान नोंदले गेले. यंदाच्या हिवाळ्यातील हे नीचांकी तापमान आहे. 

गव्हासाठी पोषक वातावरण 
जिल्ह्यातील बहुतांश शेतकऱ्यांनी रब्बी हंगामात गव्हाची पेरणी केली आहे. गहू पिकाच्या वाढीसाठी थंडी आवश्‍यक असते. त्यामुळे सध्या निर्माण झालेली थंडी गहू पिकाच्या वाढीसाठी पोषक असल्याचे शेतकरी सांगत आहेत.