esakal | Parbhani Breaking ; सहा पॉझिटिव्ह रुग्णांची पडली भर, रुग्ण संख्या ७५ 
sakal

बोलून बातमी शोधा

corona

परभणी जिल्ह्यात दिवसेंदिवस कोरोना बाधितांची संख्या वाढत आहे. यातच मागील तीन दिवसांपूर्वी एकदाच ३१ रुग्ण वाढल्यानंतर दोन दिवस स्वॅबचे अहवाल प्रलंबित राहिले तेवढाच दिलासा परभणीकरांना मिळाला. पुन्हा शुक्रवारी एका ६० वर्षीय इसमास कोरोनाची बाधा झाल्याचा अहवाल सकाळी हाती आला तर रात्री पुन्हा सहा जणांचा अहवाल पॉझिटिव्ह आला आहे. 

Parbhani Breaking ; सहा पॉझिटिव्ह रुग्णांची पडली भर, रुग्ण संख्या ७५ 

sakal_logo
By
सकाळ वृत्तसेवा

परभणी ः परभणी जिल्ह्यात शुक्रवारी (ता. २९) दिवसभरात सात जणांचे अहवाल पॉझिटिव्ह आले. यामध्ये जिंतूर तालुक्यातील वाघी बोबडे येथील एका साठ वर्षीय व्यक्तीचा अहवाल सकाळी पॉझिटिव्ह आला तर रात्री नऊच्या सुमारास सहा जणांचे अहवाल पॉझिटिव्ह आले. ज्यात पूर्णा येथील दोन, गंगाखेड एक, मानवत एक, सेलू तालुक्यातील ब्रह्मवाकडी येथील एक व जिंतूर येथील एकाचा समावेश आहे. जिल्ह्यातील एकूण रुग्णांची संख्या ७५ झाली आहे. 

परभणी जिल्ह्यात मुंबई येथील पनवेलमधून वाघी बोबडे येथील व्यक्ती त्याच्या कुटूंबियासह (ता.१५) मे रोजी दुपारी वाघी बोबडे (ता.जिंतूर) येथे आला होता. बुधवारी (ता.२७) त्यांना प्रकृती अस्वास्थामुळे परभणीतील खासगी रुग्णालयात उपचारासाठी दाखल करण्यात आले होते. परंतू, त्यानंतर त्यांना तातडीने जिल्हा शासकीय रुग्णालयात दाखल करण्यात आले. तेथे त्यांची तपासणी करून त्यांचा स्वॅब तपासणीसाठी पाठविण्यात आला होता.

हेही वाचा - Parbhani Breaking ; साठ वर्षीय इसमास कोरोनाची बाधा

मुंबईहून चार जण परतले होते
शुक्रवारी (ता.२९) दुपारी या स्वॅब तपासणीचा अहवाल जिल्हा शासकीय रुग्णालयास प्राप्त झाला. त्यात ते पॉझिटिव्ह असल्याचे समोर आले. दरम्यान, कोरोना बाधित व्यक्तीसोबत मुंबईहून त्यांची पत्नी, मुलगा इतर एक जण असे चार व्यक्ती आले होते. त्यातील मुलगा व गाडीचालक परत मुंबईला निघून गेले.

रात्री सहा अहवाल पॉझिटिव्ह 
शुक्रवारी सायंकाळी ८७ स्वॅब नमुन्यांचा अहवाल प्राप्त झाला. यात पूर्णा येथील दोन, गंगाखेड एक, मानवत एक, सेलू तालुक्यातील ब्रह्मवाकडी येथील एक व जिंतूर येथील एकाचा समावेश आहे.   

आयुक्तांनी घेतला प्रतिबंधात्मक उपाययोजनांचा आढावा
परभणी : महापालिकेचे आयुक्त देविदास पवार यांनी गुरुवारी (ता. २८) घेतलेल्या सर्व विभागप्रमुख, डॉक्टर यांच्या बैठकीत कोरोनाचा प्रतिबंध, उपाययोजना व आपत्ती व्यवस्थापनाचा आढावा घेतला. दरम्यान, त्यांनी शहरातील विविध ठिकाणच्या विलगीकरण केंद्रांना भेटी देऊन व्यवस्थेची पाहणी केली. महापालिकेत झालेल्या या बैठकीत आयुक्त श्री. पवार यांनी संस्थात्मक विलगीकरण कक्षात ठेवलेल्या संशयित रुग्णांच्या सुविधांचा आढावा घेऊन तेथे प्रमुखांच्या नियुक्त्या केल्या. या इमारतीमध्ये पिण्याच्या पाण्याची, सांडपाणी, स्वच्छता, सॅनिटायझर व्यवस्थेकडे कटाक्षाने लक्ष देण्यास सांगितले. सहायक आयुक्त शिवाजी सरनाईक, संतोष वाघमारे, सुधाकर किंगरे, अल्केश देशमुख, मुंतजिबखान, करण गायकवाड यांची त्या ठिकाणी नेमणूक केली. होम क्वारंटाइन केल्यानंतर नागरिक फिरू शकतात, त्यांनी घरात राहावे यासाठी त्या परिसरात सहायक आयुक्त, आरोग्य विभागातील कमर्चाऱ्यांनी भेटी द्याव्यात. शहरातील मुख्य चेकपोस्ट गंगाखेड रोड, पाथरी रोड, वसमत रोड या ठिकाणी बाहेरगावांहून येणाऱ्यांची माहिती घ्यावी. 

परभणी कोरोना मिटर
एकूण रुग्ण - ७५
उपचार सुरु - ७३
घरी सोडले - एक
मृत्यु - एक