साबांच्या लिपिकास झोडपले...

नांदेड : रस्त्याच्या कामाची माहिती न देणाऱ्या एका लिपीकास तिघांनी संगनमत करून कार्यालयातच मारहाण केली. ही घटना बिलोलीच्या सार्वजनीक बांधकाम विभागाच्या कार्यालयात तिन जानेवारी रोजी घडली. 

बिलोली तालुक्यातील बडूर ते आदमपूर या रस्त्याचे झालेल्या कामाची माहिती घेण्यासाठी अमोल माधव झुंझारे, भूजंग माधव झुंझारे दोघे रा. साठेनगर, देगलूर आणि किशन रानडे रा. गडगा (ता. नायगाव) हे तिघेजण सार्वजनिक बांधकाम विभागाच्या कार्यालयात शुक्रवारी (ता. तिन) जानेवारी रोजी गेले. बडूर ते आदमपूर या रस्त्याची माहिती लिपीक माधव पांडूरंग मोरे यांना विचारली. परंतु ही माहिती तोंडी देता येत नाही, त्यासाठी माहिती अधिकारातून माहिती विचारा असे त्यांना श्री. मोरे यांनी सांगितले. मात्र संतप्त झालेल्या या तिघांनी संगनमत करून श्री. मोरे यांना शिविगाळ करत मारहाण केली. एवढेच नाही तर त्यांच्या टेबलवरील सर्व फाईलींची फेकाफेक करून कार्यालयात दहशत पसरविली. हा कर्मचाऱ्यांचे वैद्यकिय बिल फाडून नुकसान केली. तसेच ठार मारण्याची धमकी दिली. 

बिलोली पोलिस ठाण्‍यात गुन्हा 

हा प्रकार श्री. मोरे आपल्या वरिष्ठ अधिकाऱ्यांच्या कानाववर घातला. त्यानंतर चक्क आठ दिवसांनी या प्रकरणाची त्यांनी बिलोली पोलिस ठाण्यात तक्रार दिली. माधव मोरे यांच्या फिर्यादीवरुन बिलोली पोलिस ठाण्यात अमोल झुंझारे, भूजंग झुंझारे आणि किशन रानडे यांच्याविरुध्द शासकिय कामात अडथळा, संगनमताने मारहाण आदी कलमान्वये गुन्हा दाखल करण्यात आला. तपास सहाय्यक पोलिस निरीक्षक माधव वाडेकर करीत आहेत. 

हेही वाचा - ‘या’ जिल्ह्यात थंडीची हुडहुडी कायम

शासकिय कर्मचाऱ्यांवर हल्ले चिंतेचा विषय 

शासकिय कार्यालयात कुठली माहिती संबंधित अधिकारी किंवा कर्मचाऱ्यांना विचारल्यानंतर ती माहिती देण्यास टाळाटाळ करतात. खरे तर झालेल्या कामाची माहिती देणे काही गैर नाही. परंतु आपल्या अधिकाराचा गैरवापर करत काही शासकिय कार्यालयातील मंडळी माहिती देण्यास टाळाटाळ करतात. त्यामुळे त्यांच्यावर हल्ले होतात. वाढते हल्ले चिंतेची बाब असून सर्वसामान्यांना विचारलेली माहिती दिली तर हे प्रकार थांबतील असे बोलल्या जाते. 

येथे क्लीक करा - शेतकऱ्याने का घेतला गळफास...वाचा सविस्तर

कायदाचा वचक कमी झाल्याचा फायदा

शासकिय अधिकारी किंवा कर्मचारी यांच्यावर हल्ला करणाऱ्यांचे प्रकरण तपास करून दोषारोपपत्र न्यायालयात जाणे आवश्‍यक आहे. फक्त सहा महिण्यात या प्रकरणाचा निवाडा होणे अपेक्षीत आहे. परंतु तसे होतांना दिसत नाही. या कलमामध्ये दोन वर्ष सक्त मजुरी व रोख दंडाची शिक्षा देण्यात आलेली आहे. हल्लेखोरांना जर तात्काळ शिक्षा झाली तर यावर आळा बसु शकतो.