जादा दराने कपाशी बियाणांची विक्री करणाऱ्या कृषी सेवा केंद्रावर छापा; कृषी विभागाच्या भरारी पथकाची कारवाई

आडुळ : पैठण तालुक्यातील कृषी सेवा केंद्र (Agricultural Service Center Paithan) चालक कपाशीच्या विविध वाणाची जास्त दराने विक्री करीत असल्याच्या तक्रारीनंतर शनिवारी पैठण तालुक्याच्या कृषी विभागाच्या भरारी पथकाने तालुक्यात जादा दराने कपाशीचे बियाणे (Cotton Seed) विक्री करणाऱ्या, तसेच जास्त मागणी असणाऱ्या वाणांची उपलब्धता असूनही शेतकऱ्यांना विक्री न करणाऱ्या कृषी सेवा केंद्रावर छापे टाकून धडक मोहीम राबविली.

सदरील धडक मोहिमेत डमी ग्राहक पाठवून जादा मागणी असणाऱ्या कपाशी बियाण्याची चढ्या भावाने विक्री करताना पोरगाव (ता. पैठण) येथील पंचावतार कृषी सेवा केंद्रात कबड्डी वाणाचे ४७५ ग्रामचे एक पाकिट ज्याची मूळ किंमत ८६४ रुपये असतांना सदरील विक्रेत्याने बाराशे रुपयांना फोन पेद्वारे विकल्याने कृषी सेवा केंद्राची तपासणी करून दुकान सील केले.

परवाना रद्द करण्याचा अहवाल जिल्हा अधीक्षक कृषी अधिकाऱ्यांना पाठवण्यात आला आहे. ही कारवाई जिल्हा अधीक्षक कृषी अधिकारी प्रकाश देशमुख यांच्या मार्गदर्शनाखाली उपविभागीय कृषी अधिकारी धनश्री जाधव, तालुका कृषी अधिकारी संदीप शिरसाट, आडुळ कृषी मंडळ अधिकारी वल्लभ भोसले मंडळ यांनी केली.

अशा कारवाया तालुक्यात सुरुच राहणार असून कोणी कृषी सेवा केंद्र चालक बियाणे किंवा रासायनिक खताची जास्त दराने विक्री करीत असेल तर कृषी विभागाला किंवा मला वैयक्तिक कळवा सदरील दुकानावर छापा टाकून त्याच्यावर तत्काळ कारवाई करण्यात येईल.

-संदीप शिरसाट, कृषी अधिकारी, पैठण तालुका