साडेसाती काळात काय राहील तीन राशींचे राशीफल

पौष अमावास्या, म्हणजेच शुक्रवारी (ता. २४) सकाळी ९ वाजून ५३ मिनिटांनी शनि मकर राशीत प्रवेश करणार आहे. वृश्चिक राशीची साडेसाती संपून या दिवसापासून कुंभ राशीला साडेसाती चालू होत आहे. धनु, मकर आणि कुंभ राशींना साडेसाती राहणार आहे. याबद्दल वेदमूर्ती ज्योतिषाचार्य अनंत लक्ष्मणराव पांडव यांनी तीन्ही राशींचे फलित सांगितले. ते eSakal.com च्या वाचकांसाठी... 

धनू 

आर्थिक वृद्धी होईल. आपण मुळातच एक उत्तम सल्लागार आहात. विद्वान आहात व सात्विक वृत्ती आहे. साडेसातीमुळे २०१८ - १९ ही वर्षं पूर्णपणे खराब गेली. प्रत्येक कामात अडथळे व अपयश आले. परंतु आता मात्र तसे होणार नाही.

या वर्षात आर्थिक वृद्धी होईल. स्थावर इस्टेटीचे प्रश्न मार्गी लागतील. तसेच बराचसा ओढा अध्यात्माकडे राहील. अचानक धनलाभाचे योग आहेत. नोकरी/व्यवसायात वृद्धी होईल. नवीन कल्पना सुचतील. त्या अंमलात येतील व त्यात यशही मिळेल. 

मकर 

साडेसाती असल्याने अखंड सावधान राहावे. आपला स्वभाव धीरगंभीर, भावनाप्रधान, शिस्तप्रिय आहे. लोकांचे आपल्याबद्दल प्रचंड गैरसमज आहेत. त्यातच साडेसातीमुळे मानसिक क्लेश खूप संभवतात. कमालीचा एकांतवास जाणवेल.

क्लिक करा - या तीन राशींच्या लोकांनी राहा शनीपासून सावध

त्यामुळे आपणच शांतता, संयम ठेवावा. जिभेवर पूर्णपणे नियंत्रण ठेवावे. लेखक असाल, तर एखादी सुंदर कलाकृती आपल्याकडून लिहिली जाईल. पती-पत्नीने एकमेकांना समजून घेणे आवश्यक आहे. कायदा मोडू नका, नाही तर अटक होण्याचे योग आहेत.

कुंभ

आपल्या साडेसातीला सुरवात होत आहे. लग्नेशाचे व्ययस्थानातून भ्रमण होत आहे. त्यामुळे कोणतेही कारण नसताना आपणाकडून नुकसान होऊ शकते. वास्तविक आपल्याला हुशारीपणा व धूर्तपणा हे गुण मुळातच मिळाले आहेत. त्यामुळे नुकसान होणार नाही, याची दक्षता घ्या.

वाचा - काय आहे शिवाजी महाराजांच्या राजमुद्रेचा अर्थ

नोकरी, व्यवसायात दीर्घकालीन एखादी अडचण उभी राहू शकते. आरोग्याची काळजी घ्या. डॉक्टरांना निदान होण्यास अडचणी निर्माण होतील. विवाह ठरविताना काळजी घेणे आवश्यक. तसेच आपली फसवणूक होणार नाही, याची दक्षता घ्यावी. 

वरील तिन्ही राशींना साडेसातीनुसार राशीप्रमाणे मिळणारे फलित मांडण्यात आलेले आहे. पण प्रत्येकाच्या जन्मकुंडलीनुसार गोचरीचा शनि ज्या स्थानामधून भ्रमण करत असेल, त्याप्रमाणे फळदेखील बदलू शकते.