परभणी ः खुद्द उर्जा मंत्री नितीन राऊत यांनी वीज बिल माफ केले जाईल अशी घोषणा केली होती. परंतू, सत्तेत बसलेल्या शिवसेना व राष्ट्रवादी कॉँग्रेसनेच कॉँग्रेसचे उर्जा मंत्री नितीन राऊत यांचा गेम केला. त्यामुळेच उर्जामंत्र्यांनी वीज बिल माफीबद्दल घुमजाव केले असा आरोप भाजपचे माजी मंत्री बबनराव लोणीकर यांनी रविवारी (ता.२९) परभणीत पत्रकारांशी बोलतांना केला. पुढील निवडणुकीत या दोन्ही पक्षांना कॉँग्रेस संपवायचीच आहे असे दिसत असल्याचे श्री.लोणीकर म्हणाले.
राज्यातील महाविकास आघाडी सरकारने त्यांचा एक वर्षाचा कार्यकाळ पूर्ण केला. या एक वर्षाच्या कार्यकाळात सरकारच्या वतीने राबविण्यात आलेल्या धोरणावर बबनराव लोणीकर यांनी टिकेची झोड उठविली. रविवारी (ता.२९) ते परभणीत पत्रकारांशी बोलत होते. या वेळी भाजप आमदार मेघना बोर्डीकर, महानगर जिल्हाध्यक्ष आनंद भरोसे, ग्रामीण जिल्हाध्यक्ष डॉ.सुभाष कदम, माजी आमदार अॅड. विजयराव गव्हाणे, माजी आमदार मोहन फड यांच्यासह भाजपचे इतर नेते उपस्थित होते.
महाविकास आघाडी सरकार शंभर टक्के अपयशी
श्री.लोणीकर म्हणाले, सरकार स्थापनेनंतर राज्यातील महाविकास आघाडी सरकारने जी आश्वासने दिली होती. ती आश्वासने त्यांनी पूर्ण केलेली नाहीत. वर्षभराच्या कामकाजात सरकार शंभर टक्के अपयशी झाल्याचा आरोप त्यांनी या वेळी केला. राज्यातील शेतकऱ्यांचा विश्वासघात करणारे हे सरकार असल्याचे सांगत राज्यातील अनेक महत्वकांक्षी योजनांना स्थगिती देण्याचे काम या सरकारने वर्षभरात केले आहे. मराठवाड्याचा दुष्काळ कायमचा मिटविण्यासाठी भाजप सरकारने सुरु केलेल्या मराठवाडा वॉटरग्रिड या योजनेसही स्थगिती देण्याचे काम करून परत मराठवाड्याला दुष्काळाच्या छायेत लोटण्याचे काम या सरकारने केले आहे.
राऊत यांचा विधानावरून घुमजाव
कोरोनाचा सामना करत असतांना राज्यातील जनतेला दिलासा देण्यासाठी वीज बिलाची माफी देण्यात येणार असल्याची घोषणा कॉँग्रेसचे उर्जा मंत्री नितीन राऊत यांनी केली होती. परंतू नंतर त्यांनी या विधानावरून घुमजाव केला. खरे तर मंत्री नितीन राऊत यांचा या विधानावरून त्यांचेच मित्र पक्ष असलेल्या शिवसेना व राष्ट्रवादी कॉँग्रेसने गेम केला असल्याचा आरोप या वेळी बबनराव लोणीकर यांनी केला. यावरूनच या दोन्ही पक्षांना पुढील निवडणुकीत राज्यातून कॉँग्रेस पूर्णपणे संपवायची आहे हे स्पष्ट होत असल्याचेही ते म्हणाले.
संपादन ः राजन मंगरुळकर
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.
