खोतकरांचा शिंदे गटाला पाठींबा जाहीर; उद्धव ठाकरेंची साथ सोडताना अश्रू अनावर

जालना : शिवसेना नेते अर्जुन खोतकर यांनी अखेर एकनाथ शिंदे गटाला पाठींबा जाहीर केला. पत्रकार परिषदेतून त्यांनी आपला निर्णय जाहीर केला. यावेळी उद्धव ठाकरे यांची साथ सोडताना त्यांना अश्रू अनावर झाले होते. खोतकर शिंदेंना पाठिंबा देणार असल्याची गेल्याकाही दिवसांपासून चर्चा सुरु होती. (ShivSena MLA Arjun Khotkar support for Shinde Group of ShivSena)

पत्रकार परिषदेत खोतकर म्हणाले, आज सकाळी पक्षप्रमुख उद्धव ठाकरेंशी माझं सविस्तर बोलणं झालं. माझ्यावर ओढवेलली माहिती मी पक्षप्रमुखांना सांगितली. त्यानंतर मी संजय राऊतांशी बोललो. जिल्ह्यातील सर्व नेत्यांशी बोललो. मी ४० वर्षांचा सच्चा शिवसैनिक आहे. कुटुंबियांसाठी मला काही निर्णय करणं गरजेचं आहे, असं सांगताना मी उद्धव ठाकरेंची परवानगी मागितली. त्यानंतर मी आज शिवसैनिकांच्या साक्षीनं मुख्यमंत्री एकनाथ शिंदे यांचं समर्थन करण्याचा निर्णय घेतला आहे.

पक्षप्रमुख म्हणून सहकाऱ्यांना सुरक्षित करणं गरजेचं

पक्षप्रमुख म्हणून उद्धव ठाकरेंना आपल्या सहकाऱ्यांना सुरक्षित करणं गरजेचं आहे. मला असं निश्चित वाटतं की, त्यांच्या निर्णयाच्या माध्यमातून त्यांनी मला सुरक्षित केलं असेल. उद्धव ठाकरे मला म्हणाले की, तुम्ही अडचणीत असाल तर निर्णय घेऊ शकता. माझ्यासमोर अडचण कोणी निर्माण केली हे सांगायची गरज नाही. हे सर्वांना माहिती आहे, असंही खोतकर म्हणाले.

माझ्यावरील चौकशीचं प्रकरण न्यायप्रविष्ठ आहे, त्यामुळं मला त्यावर बोलायचं नाही. पण ज्या संविधानिक संस्था आहेत त्यांना चौकशीचे अधिकार आहेत. पण यामध्ये माझं संपूर्ण कुटुंबाची परवड होत आहे. त्यामुळं तुम्हाला काय अर्थ लावायचा तो लावा पण मी आता एकनाथ शिंदेंना पाठिंबा दिला आहे. अडचणीतला माणूस सहारा शोधत असतो ना, असंही यावेळी अर्जुन खोतकर यांनी स्पष्ट केलं.