बदनापूर - राज्यातील महायुती सरकारने निवडणूक जाहीरनाम्यात शेतकऱ्यांना कर्जमाफी देण्याचे वचन दिले होते, मात्र सत्तेत आल्यानंतर त्यांना कर्जमाफीच्या वचनाचा विसर पडला. त्यामुळे शेतकऱ्यांना सरसकट कर्जमाफी मिळत नाही, तो पर्यंत अकोला (ता. बदनापूर) येथील एका शेतातील विहिरीत आमरण उपोषण करण्याचा निर्णय शिवसेना उध्दव ठाकरे पक्षाचे कारभारी म्हसलेकर यांनी घेतला आहे.
त्या अनुषंगाने त्यांनी बुधवार (ता. २६) पासून विहिरीत बाज टाकून उपोषण सुरू केले. शासनाने शेतकऱ्यांच्या कर्जमाफीचा निर्णय जाहीर करावा, त्यानंतरच उपोषण सोडण्यात येईल, अशी आक्रमक भूमिका देखील आंदोलनकर्ते म्हसलेकर यांनी घेतली आहे. दरम्यान, या अनोख्या आंदोलनाला पाठिंबा देण्यासाठी आंदोलनस्थळी शेतकऱ्यांची मोठी गर्दी होत आहे.
आंदोलनकर्ते कारभारी म्हसलेकर यांनी 'सकाळ' शी बोलताना सांगितले की, राज्यातील महायुती सरकारने विधानसभा निवडणुकीला सामोरे जाताना शेतकऱ्यांना सरसकट कर्जमाफी देण्याचे वचन दिले होते. राज्यात महायुतीचे सरकार मोठ्या बहुमताने सत्तारूढ झाले. मात्र त्यांना शेतकऱ्यांच्या कर्जमाफीचा जाणीवपूर्वक विसर पडला.
शेतकऱ्यांच्या कर्जमाफीबद्दल सरकारमधील मुख्यमंत्री, उपमुख्यमंत्री, मंत्री आणि आमदार काहीच बोलत नाहीत. राज्यातील शेतकरी आर्थिक अडचणीत सापडले आहेत. त्यामुळे शासनाने शेतकऱ्यांची सरसकट कर्जमाफी करून त्यांना दिलासा द्यावा, या मागणीसाठी मी अकोला शिवारातील एका विहिरीत बाज टाकून बुधवार (ता. २६) पासून आमरण उपोषण सुरू केले आहे.
शासन जो पर्यंत शेतकऱ्यांच्या कर्जमाफीचा निर्णय घेत नाही, तो पर्यंत आमचे विहिरीत बाज टाकून आंदोलन सुरूच राहणार आहे. शेतकऱ्यांच्या कर्जमाफीसाठी आम्ही नागपूर येथील हिवाळी अधिवेशनात आंदोलन केले. बदनापूर येथील तहसील कार्यालय आवारातील झाडांवर बसून हनुमान उडी आंदोलन केले.
मुंबई येथे काल - परवाच अर्थसंकल्पीय अधिवेशनाचे औचित्य साधून मंत्रालयात जाऊन कर्जमाफीच्या मागण्यांचे पत्रके उधळून आंदोलन केले. या आंदोलनामुळे शासनाने आम्हाला एक दिवस मुंबईच्या मरीन ड्राईव्ह पोलिस ठाण्यात डांबून ठेवले होते. मात्र आम्ही शेतकऱ्यांच्या प्रश्नासाठी लढा देत आहोत, असे स्पष्ट केले.
यावेळी आंदोलनस्थळी ऋषिकेश थोरात, दत्ता सांगळे, सोपान काळे, सरपंच माधवराव गीते, माधव डवणे, इम्रान शेख आदींसह शेतकऱ्यांची मोठी उपस्थिती होती. यावेळी कारभारी म्हसलेकर यांच्या आंदोलनाला पाठिंबा दर्शविण्यासाठी उपस्थितांनी जोरदार घोषणाबाजी केली. दरम्यान, स्वराज्य पक्षाचे पंकज जऱ्हाड यांनी आंदोलनस्थळी भेट देऊन म्हसलेकर यांच्या आंदोलनाला जाहीर पाठिंबा दिला.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.