औसा, निलंगा, जळकोट, शिरुरमध्ये कडकडीत बंद

लातूर ः जिल्ह्यात चाकूर, निलंगा, औसा, जळकोट, जानवळ, नळेगाव, शिरुर अनंतपाळ येथे नागरिकत्व सुधारणा कायदा व राष्ट्रीय नागरित्व नोंदणी कायद्यांविरोधात शुक्रवारी (ता.24) कडकडीत, तर उदगीर शहरात बंदला संमिश्र प्रतिसाद मिळाला. वंचित बहुजन आघाडी व इतर संघटनांनी सदरील कायद्यांविरोधात राज्यात बंदची हाक दिली होती.

औसा : नागरिकत्व सुधारणा कायदा व राष्ट्रीय नागरिकत्व नोंदणी कायद्या विरोधात शुक्रवारी औसा शहरात कडकडीत बंद पाळण्यात येत असून सकाळपासूनच औषधी दुकाने, बॅंका व दवाखाने वगळता अन्य सर्व दुकाने बंद आहेत. शाळा, महाविद्यालयात विद्यार्थीच नसल्याने या ठिकाणीही अघोषित बंदच दिसून येत आहे.
वंचित आघाडी व अन्य संघटनांनी पुकारलेल्या महाराष्ट्र बंदचा चांगला परिणाम औसा शहरात शुक्रवारी दिसून आला. गुरुवारी दुपारपासूनच शहरातील व्यापाऱ्यांना ध्वनिक्षेपकावरून शुक्रवारच्या बंदची माहिती दिली जात होती.

हेही वाचा - विहिरीत आढळला महिलेसह मुलीचा मृतदेह

सर्वांनी या बंदमध्ये सहभागी होण्याचे आवाहन करण्यात येत होते. त्यामुळे शुक्रवारी सकाळपासूनच व्यापाऱ्यांनी आपली प्रतिष्ठाने बंदच ठेवली होती. सकाळी अकरा वाजता शहरातून एक आवाहन फेरी काढण्यात आली. यामध्ये जी प्रतिष्ठाने सुरू होती ती बंद करण्याचे आवाहन करण्यात आले. दुपारी शुक्रवारच्या नमाजनंतर येथील नगरपालिकेच्या सांस्कृतिक सभागृहाच्या मैदानावर आंदोलनाची दिशा ठरविण्यासाठी लोक एकत्र येणार असल्याचे समजते.

येथे क्लिक करा -पीडितेवरील आत्याचाराविरोधात पक्ष संघटना एकवटल्या

या ठिकाणी शाहीन बागच्या धर्तीवर साखळी पद्धतीने आंदोलन करण्या संदर्भात महत्वपूर्ण निर्णय घेतल्याचेही समजत आहे. या बंद दरम्यान कुठेही अनुचित आणि अप्रिय घटना घडू नये म्हणून उपविभागीय पोलीस अधिकारी राजीव नवले यांच्या मार्गदर्शनाखाली चोख बंदोबस्त ठेवण्यात आले आहे. भादा आणि किल्लारी पोलीस ठाण्यांतर्गत येणाऱ्या उजनी, किल्लारी आदी भागात पोलीस गस्ती वाढवण्यात अली आहे. अद्यापपर्यंत बंद शांततेत सुरू आहे.