मोठ्या ११ धरणातील पाणीसाठा झाला साठ टक्के

औरंगाबाद : सुरुवातीला झालेला जोरदार पाऊस आणि आता गेल्या काही दिवसांपासून मान्सूनचे मराठवाड्यात झालेले पुनरागमन यामुळे धरणातील पाणीसाठ्यात वाढ झाली आहे. मात्र उस्मानाबाद जिल्ह्यातील प्रकल्पातील पाणीसाठा फारसा समाधानकारक नाही. मोठ्या ११ धरणात ६० टक्के पाणीसाठा झाला आहे.

जलसंपदा विभागाकडून प्राप्त शुक्रवार (ता. २७ ) पर्यंतच्या अहवालानुसार मराठवाड्यातील ११ मोठ्या धरणांची प्रकल्पातील ५१४३ दशलक्ष घनमीटर संकल्पित पाणी साठा आहे यांपैकी ४८२५ दशलक्ष घनमीटर पाणीसाठा झाला असून यांपैकी ३०९० दशलक्ष घनमीटर उपयुक्त पाणीसाठा आहे. आठवडाभरात १९०६ दशलक्षघनमीटर पाणी वाढले आहे. हा साठा ६० टक्के इतका आहे, गेल्या वर्षी याच तारखेला ७८ टक्के पाणीसाठा होता.

तसेच ७५ मध्यम प्रकल्पांमध्ये ४१२ दशलक्षघनमीटर उपयुक्त पाणीसाठा म्हणजेच ४४ टक्के उपयुक्त पाणीसाठा आहे. गेल्यावर्षी ५८ टक्के उपयुक्त पाणीसाठा होता, त्या तुलनेत मध्यम प्रकल्पातील पाणीसाठा कमी आहे. तसेच ७५३ लघू पाटबंधारे प्रकल्पात सध्या ६६९ दशलक्ष घनमीटर तर ४० टक्के उपयुक्त पाणीसाठा आहे. गेल्यावर्षीही ४० टक्के उपयुक्त पाणीसाठा होता.

अद्यापही २८ लघुप्रकल्प कोरडेठाक

आठ जिल्ह्यात मिळून ७५३ लघू प्रकल्प आहेत यांपैकी औरंगाबाद जिल्ह्यातील ५, बीड जिल्ह्यातील ६, लातुर जिल्ह्यातील ९ तर उस्मानाबाद जिल्ह्यातील ८ असे २३ प्रकल्प अद्यापही कोरडेठाक आहेत तर १६४ लघूप्रकल्पात जोत्याच्या खाली पाणी आहे. २२१ लघू प्रकल्पात २५ टक्क्यांपेक्षा कमी तर ८७ लघूप्रकल्पात २५ ते ५० टक्के पेक्षा कमी पाणी आहे. ५७ लघूप्रकल्पात ५० ते ७५ टक्के तर १९६ लघूप्रकल्पात ७५ टक्केपेक्षा जास्त पाणीसाठा झाला आहे.

आठ मध्यम प्रकल्प जोत्याखाली

मराठवाड्यात ७५ मध्यम प्रकल्प आहेत त्यातील सर्वच प्रकल्पात पाणी जमा झाले असले तरी ८ प्रकल्पात जोत्याच्या खाली पाणी आहे. २३ प्रकल्पात २५ टक्क्यांपेक्षा कमी तर २१ प्रकल्पात २५ ते ५० टक्के पाणी साठा झाला आहे. तर ७ प्रकल्पात ५० ते ७५ टक्के आणि १६ मध्यम प्रकल्पांमध्ये ७५ टक्क्यांपेक्षा जास्त पाणीसाठा झाला असल्याचे जलसंपदा विभागाच्या अहवालात म्हटले आहे.

मोठ्या धरणातील साठा (आकडे दशलक्ष घनमीटरमध्ये )

प्रकल्पाचे नाव............उपयुक्त पाणीसाठा ..........टक्केवारी

० जायकवाडी -...........९०८ ........................४२

० येलदरी ...............६९३ ...........................८६

० सिद्धेश्वर ...............७९...........................९७

० माजलगाव .............१११...........................३५

० मांजरा ..................४०............................२२

० ऊर्ध्व पेनगंगा ...........७८० .......................... ८१

० निम्न तेरणा ...............४७ ..........................५२

० निम्न मनार .................१३७ ..................... ९९

० विष्णूपुरी ..................७९ ..........................९८

० निम्न दुधना ................२१६.......................८९

० सीना कोळेगाव............००.........................०