वाळू वाहतुकीवर बैठे पथकांची नजर

हिंगोली : तालुक्यातील अवैध गौण खनिज व वाळू वाहतुकीवर अंकुश ठेवण्यासाठी पाच बैठे पथकांची नियुक्ती करण्याचा निर्णय प्रभारी तहसीलदार मधुकर खंडागळे यांनी घेतला आहे. यामध्ये स्वतः तहसीलदार सहभागी होणार आहेत.

तालुक्यात अवैध गौण खनिज उत्खनन व वाहतूक होत आहे. चोरट्या मार्गाने यातून उलाढाल होत असून यामुळे शासनाचा लाखो रुपयांचा महसूल बुडत आहे. त्यामुळे अवैध गौण खनिज उत्खनन व वाहतुकीवर अंकुश ठेवण्यासाठी जिल्हाधिकारी रुचेश जयवंशी, उपविभागीय अधिकारी अतुल चोरमारे यांच्या मार्गदर्शनाखाली प्रभारी तहसीलदार मधुकर खंडागळे यांनी पाच बैठे पथकांची नियुक्ती करण्याचा निर्णय घेतला आहे. 

हेही वाचा - इच्‍छुक उमेदवारांना निवडणुकीचे वेध

सहा तलाठी एका पथकात नियुक्त

या साठी एका मंडळ अधिकाऱ्यासह पाच ते सहा तलाठी एका पथकात नियुक्त करण्यात आले आहेत. बैठे पथक वाळू, दगड, मुरूम, वाळू उत्खनन व वाहतुकीवर नियंत्रण ठेवणार आहेत. मंडळ अधिकारी मधुकर खंदारे यांच्या पथकात तलाठी पी. डी. इंगोले, एन. डी. कांबळे, पी. एस. पांडे, सय्यद अयूब सय्यद रसूल, वामन राठोड, सय्यद अब्दुल हैदर, एच. एस. गवई यांचा समावेश असून हे पथक सोमवार व शनिवार असे दोन दिवस रात्रं-दिवस गस्त घालणार आहे. 

मंडळ अधिकाऱ्यांचा समावेश

दुसऱ्या पथकात मंडळ अधिकारी जी. एस. पारिस्कर, तलाठी आर. एन. इंगोले, पी. एल. महालनकर, ए. के. केंद्रेकर, श्रीमती एस. आर. शिरसाठ, आर. आर. देशमुख यांचा समावेश आहे. हे पथक मंगळवार, रविवारी गस्त घालणार आहे. तिसऱ्या पथकात एच. एस. मुंढे, व्ही. बी. बेले, शेख मोईब शेख तुफैल, श्रीमती अबूज, ए. व्ही. गवई यांचे असून हे पथक बुधवारी गस्त घालणार आहे. 

येथे क्लिक करा - देशसेवेला वाहिलेले ‘पोतरा गाव’

अहवाल सादर करावा लागणार

तसेच मंडळ अधिकारी शेख अल्लाबक्ष यांच्या नेतृत्वाखाली एम. एस. खंदारे, जी. एस. रणखांब, आर. के. इंगोले, श्रीमती आर. बी. वटाने, एस. आर. चौधरी, व्ही. एम. मस्के यांचे पथक गुरुवारी गस्त घालणार आहे. तर के. एन.पोटे यांच्या नेतृत्वाखाली सी. टी. साबळे, श्री. इंगळे, डी. पी. धरणे, एस. यू. लोंढे, किसन तनपुरे, एम. डी. भालेराव यांचे पथक शुक्रवारी गस्त घाणार आहे. दररोज केलेल्या कारवाईचा अहवाल सायंकाळी सहा वाजेपर्यंत कार्यालयात सादर करावा लागणार आहे. कामात दिरंगाई केल्याचे आढळून आल्यास त्‍या बाबतचा अहवाल वरिष्ठ अधिकाऱ्यांकडे सादर केला जाणार आहे.

वाळू चोरीवर लगाम

अवैध वाळू उत्खनन व वाहतुकीवर आळा घालण्यासाठी महसूल विभागाकडून पाच पथकांची नियुक्ती करण्यात आली आहे. त्यामुळे शहर व तालुक्यात होत असलेल्या वाळू चोरीवर लगाम बसणार आहे.
- मधुकर खंडागळे, प्रभारी तहसीलदार