ST Fire Accident : उमरगा आगारातील मुक्कामी एसटी बसला आग

लोहारा (जि. धाराशिव): लोहारा तालुक्यातील माकणी येथील बसस्थानकात मुक्कामी असलेलली उमरगा आगाराची एसटी बसला शुक्रवारी (ता. १७) मध्यरात्री सव्वा बाराच्या सुमारास आग लागली.

माकणी येथील बसस्थानकांत दररोज उमरगा आगाराच्या तीन व औसा आगाराच्या दोन अशा एकूण पाच बस मुक्कामी असतात. पण गुरुवारी रात्री औसा आगाराने माकणी येथे मुक्कामी असलेल्या दोन्ही बस परत बोलावल्या होत्या.

त्यात शुक्रवारी रात्री सव्वा बाराच्या सुमारास मुक्कामी असलेल्या एसटी बसला (क्रमांक एमएच- २० बीएल १७०१) आग लावली. बसला पेटवून दिल्याचे वाहतूक नियंत्रक सुभाष आळंगे यांना समजताच त्यांनी तत्काळ बसस्थानकात येऊन वरीष्ठांना बस पेटविल्याची माहिती दिली.

त्यानंतर लोकमंगल साखर कारखाण्यातील अग्निशामक गाडी बोलावून आग विझविण्याचा प्रयत्न केला. परंतु, एसटी बस जवळपास ७५ टक्के जळून खाक झाली. दरम्यान, रात्रीच उपविभागीय पोलिस अधिकारी सदाशिव शेलार , पोलिस निरीक्षक अजित चिंतले, पोकॉ विठ्ठल ढवण व एसटी महामंडळाचे अधिकारी घटनास्थळी दाखल झाले.

घटनेचा पंचनामा करुन बस रात्रीच उमरगा येथे नेण्यात आली. बसचे चालक शिवाजी पांचाळ यांनी लोहारा पोलिसांत दिलेल्या फिर्यादीवरुन अज्ञात विक्तीविरोधात शुक्रवारी (ता. १७) पहाटे सव्वा चार वाजता गुन्हा दाखल करण्यात आला आहे.