बनावट पास घेऊन आले अन् क्वारंटाईन झाले

पाथरी (जि.परभणी) : बनावट पास तयार करून खासगी वाहनाने पुण्याहून परभणीला येणाऱ्या एका कुटूंबाला पोलिस निरीक्षकाच्या सतर्कतेने रोखण्यात आले. ही घटना शुक्रवारी (ता. एक) ढालेगाव चेकपोस्टवर सकाळी घडली. या घटनेतील वाहन चालकांवर फसवणुकीचा गुन्हा दाखल करत प्रशासनाने सात जणांना क्वारंटाईन केले आहे.
लॉकडाउन हा काळ वाढत असताना आत्ता इतर ठिकाणी अडकलेल्याची घालमेल होत असून ते आता कोणत्याही परिस्थितीत घर जवळ करण्यासाठी काहीही करण्याच्या मानसिकतेवर आले आहेत. अशीच एक घटना ढालेगाव चेकपोस्ट वर उघडकीस आली आहे. रेड झोन असलेल्या पुणे येथून आसेफ युनुस शेख (रा. दर्गा रोड परभणी) हे जिल्हाधिकारी कार्यालयाची खोटी पास तयार करून आपल्या कुटूंबासह परभणीला ता. ३० एप्रिल रोजी रात्री पुण्याहून निघाले. दरम्यान, शुक्रवारी (ता.१) सकाळी १० वाजता परभणी जिल्ह्याच्या सिमेवर असलेल्या ढालेगाव चेकपोस्टवर आले. 

हेही वाचा : परभणी तापली !; पारा @ ४४.२ अंशावर

चौकशीतून आले समोर
यावेळी पोलिस निरीक्षक के. बी. बोधगिरे हे चेकपोस्ट चेकिंगसाठी ढालेगाव येथे गेले असता त्यांनी पुण्याहून आलेल्या आसेफ युनुस शेख यांची पास तपासली असता त्यांना सदर पासचा संशय आला. त्यांनी तात्काळ तहसीलदार यु. एन. कागणे यांना याबाबत माहिती दिली. तहसीलदार कागणे यांनी चेकपोस्ट गाठत पासची जिल्हाधिकारी कार्यालयाला विचारणा केली असता सदर पास आमच्या कार्यालयाकडून देण्यात आला नसल्याचे सांगण्यात आले. त्यानंतर पोलिसांनी दम दिल्यानंतर सादर पासवर खाडाखोड केल्याचे आसेफ युनुस शेख यांनी सांगितले. रात्री उशिरा आसेफ युनुस शेख यांच्यावर नायब तहसीलदार संदीप साखरे यांच्या फिर्यादीवरून फसवणुकीचा गुन्हा नोंद करण्यात आला. तसेच प्रशासनाने या सर्व कुटुंबाची तपासणी करून त्यांना क्वारंटाईन केले आहे.

हेही वाचा : मराठवाड्यातील ‘या’ तीन जिल्ह्यात आज पावसाची शक्यता -

सहा चेकपोस्टवरून सुटले कसे? 
पुण्याहून परभणीला येताना पुणे, अहमदनगर व बीड जिह्यातील प्रत्येकी दोन असे सहा चेकपोस्ट लागत असतांना ही खोटी पास तयार करून हे कुटुंब परभणी जिल्ह्याच्या सीमेपर्यंत आले असल्याने या कुटूंबाची मागील एकाही चेकपोस्टवर साधी चौकशी सुद्धा झाली नसल्याचे दिसत आहे. सहा चेकपोस्टवर सुटले कसे? असा प्रश्न उपस्थित होत आहे.