तीन महिन्यांनंतर आगारातून बाहेर पडलेल्या बसवर दगडफेक

सेनगाव (जि. हिंगोली) - हिंगोली आगारातुन (Hingoli Depo) तब्बल तीन महिन्यानंतर बाहेर एसटी बसवर (St Bus) अज्ञातांनी दगडफेक (Stone Attack) केल्याची घटना सेनगाव जिंतूर रोडवरील मकोडी फाटा येथे घडली आहे. पाथरी येथील वाहतूक निरीक्षकाच्या फिर्यादीवरून सेनगाव पोलिसात गुन्हा (Crime) दाखल करण्यात आला आहे.

ऐन दिवाळी सनावर एस टी कामगारांनी विविध मागण्यांसाठी काम बंद आंदोलन पुकारले होते. त्यांच्या मागण्या अद्याप मान्य झाल्या नाहीत. त्यामुळे अजूनही कर्मचारी कामावर हजर झालेले नाहीत. त्यामुळे प्रवाशांचे मोठे हाल होताना दिसत आहेत. याचा फायदा खाजगी वाहतूकदारांना होत आहे. प्रवाशांचे हाल पाहता शुक्रवारी (ता.२८) दुपारी तीन वाजताच्या सुमारास वाहतूक निरीक्षक शरद भाऊराव पाटील व वाहक विनोदकुमार भागवत बिल्लारी हे दोघे हिंगोली आगारातील बस क्र.एम.एच.२० बी.एल.३५०६ ही बस हिंगोली ते जिंतूर अशी सेनगाव मार्गे जिंतूरकडे दुपारी ३.४० वाजताच्या सुमारास निघाली होती.

मात्र, मकोडी फाट्यावर दोन अज्ञात व्यक्ती मोटारसायकल वरून तोंडाला रुमाल बांधून आले होते. त्यांनी हातात दगडं घेऊन बसच्या समोरील काचावर फेकून काचा फोडल्या असून अंदाजे १० ते १५ हजार रुपयांचे नुकसान केले आहे. अशी फिर्याद कर्मचाऱ्यांनी सेनगाव पोलिसांना दिली आहे. दगडफेक कोणी केली हे मात्र अद्याप समजू शकले नाही. मात्र बसच्या काचा फोडल्याने बसचं मोठं नुकसान झाल आहे. सुदैवाने यात चालक आणि वाहक यांना कुठलीही दुखापत झाली नाही. सेनगाव पोलिस या प्रकरणी पुढील तपास करीत आहेत.