Ausa Accident : ट्रकने बसला टक्कर दिल्याने बस खाली सापडून वृद्ध शेतकऱ्याचा मृत्यू

औसा - येथील अप्रोच रोड चौकात भाजी विक्रीसाठी बसलेल्या एक वृद्ध शेतकऱ्याचा बस खाली सापडून मृत्यू झाल्याची घटना गुरुवारी (ता. २०) सकाळी पावणे सात वाजण्याच्या सुमारास घडली आहे. तुकाराम बाजीराव पाटील वय (५५) रा. करजगाव ता. औसा असे या अपघातात ठार झालेल्या शेतकऱ्याचे नाव आहे.

या बाबत अधिक माहिती अशी की तालुक्यातील करजगाव येथील वृद्ध शेतकरी तुकाराम पाटील हे आपल्या शेतात भाजीपाला पिकवून त्याच्या विक्रीसाठी सकाळी सकाळी औसा शहरातील अप्रोचरोड चौकात बसत असत.

मॉर्निंग वॉक वरून येणारे जाणारे लोक त्यांच्याकडून ताजा भाजीपाला घेत. त्यांचा हा नित्यक्रम होता. उरलेला भाजीपाला मग ते गल्लोगल्ली जाऊन विकत असत. गुरुवारी (ता. २०) रोजी सकाळी ते येथील अप्रोच रोड चौकात भाजीपाला विक्रीसाठी बसले होते. या दरम्यान सकाळी पावणे सात वाजता लातुरहून आलेली एक बस चौक ओलांडून औसा गावात येत होती.

त्याच दरम्यान निलंग्याकडून भरधाव येणाऱ्या मालट्रकने चौक ओलांडणाऱ्या बसच्या मागच्या चाकाच्या बाजूने जोरदार धडक मारली. त्यामुळे ही बस फरफटत जाऊन भाजी विकत बसलेल्या तुकाराम पाटील यांच्या अंगावर चढली. या अपघातात तुकाराम पाटील हे गंभीर जखमी होऊन जागीच ठार झाले.

रोज ताजी भाजी देणारा अपघातात दगावला याची हुरहूर या रस्त्यावरून जाणाऱ्या येणाऱ्याला वाटत होती. या घटनेनंतर ट्रक चालक ट्रकसह पळून गेला. या प्रकरणी औसा पोलिसांनी अकस्मात मृत्यूची नोंद केली असून घटनेचा पुढील तपास पोलीस करीत आहेत.

उड्डाणपूल असता तर अपघात झाला नसता.....

रस्त्याच्या कडेला भाजी विकत बसलेल्या एका शेतकऱ्याला आपला जीव गमवावा लागला. अप्रोच रोड चौकात उड्डाणपूल हवा. जर येथे उड्डाणपूल असता तर हा अपघात झाला नसता आशा प्रतिक्रिया नागरिक देत आहेत. या चौकात यापूर्वीही अनेक अपघात होऊन अनेकांना आपला जीव गमवावा लागला आहे. अपघाताची आणि मृत्यूची ही शृंखला तोडायची असेल तर येथे तात्काळ उड्डाणपूल करा अशी मागणी नागरिक करू लागले आहेत.