Dharashiv News : तुळजाभवानी कृषी महोत्सव गुरुवारपासून ; धाराशिवमध्ये उपक्रम, मिळणार विविध विषयांची माहिती

धाराशिव : श्री तुळजाभवानी कृषी महोत्सवाला येथे गुरुवारपासून (ता. १८) सुरवात होत आहे. त्याची तयारी अंतिम टप्प्यात आहे. पिकांची लागवड, जोपासना तसेच विक्री व्यवस्थापन यावर परिसंवाद, चर्चासत्रांतून शेतकऱ्यांना तांत्रिक दिशा मिळणार आहे, अशी माहिती कृषी विभागाकडून देण्यात आली.

शासनाचा कृषी विभाग, ‘आत्मा’ तसेच कृषी विज्ञान केंद्र, महिला आर्थिक विकास महामंडळाच्या माध्यमातून २२ जानेवारीदरम्यान हा महोत्सव होत आहे. धाराशिव शहरातील पोलिस कवायत मैदानावर तो होईल.

याची मिळणार माहिती

रब्बी, खरीप तसेच उन्हाळी हंगामात पिकांची आधुनिक पद्धतीने लागवड कशी करावी यावर वसंत सूर्यवंशी, डॉ. अरुण गुट्टे मार्गदर्शन करणार आहेत. जिल्ह्यात रेशीम शेतीचे क्षेत्र वाढत आहे. त्यासाठी रेशीम शेतीचे तंत्रज्ञान शेतकऱ्यांपर्यंत पोचविण्याचा प्रयत्न होणार आहे. फळबाग लागवडीवर धाराशिव येथील कृषी महाविद्यालयाचे सहयोगी अधिष्ठाता डॉ. एम. बी. पाटील मार्गदर्शन करणार आहेत. दुग्ध व्यवसायासाठी शासनाच्या योजना, दुग्ध प्रक्रिया उद्योगाबाबतच्या तंत्रज्ञानावरही चर्चा होणार आहे. शेतकरी उत्पादक कंपन्या, त्यासाठी बँकांचे कर्जाचे धोरण याची माहिती मिळणार आहे.

शेतकरी हाच प्रमुख शास्त्रज्ञ असून त्याचे प्रयोग इतरांना पाहता यावेत, यासाठी प्रयोगशील शेतकऱ्यांना निमंत्रित केले आहे. महोत्सवात स्टॉलच्या माध्यमातून त्यांना संधी दिली आहे. शेतमाल विक्रीसाठी खरेदीदार-विक्रेता संमेलन होणार आहे.

- रवींद्र माने, अधीक्षक कृषी अधिकारी, धाराशिव