आगीत संसारोपयोगी साहित्य खाक, दोघांसह म्हशी जखमी

हेर (जि.लातूर) ः उदगीर तालुक्यातील करडखेल  येथे रविवारी (ता.एक) रात्री बाराच्या सुमारास लागलेल्या आगीत घरातील संसारोपयोगी साहित्य जळुन खाक झाले. यात दोघे व घरासमोर बांधलेल्या दोन म्हशी आगीत होरपळून जखमी झाल्या आहेत.  

राजाराम महादु पोपटे व पत्नी मुक्तताबाई पोपटे हे दत्ता पोपटे, जयश्री पोपटे, नामदेव पोपटे, पुजा पोपटे, सोहम पोपटे, सत्यम पोपटे हे सर्वजण कुटुंबीयांसहित रात्री जेवण करून झोपी गेले असता बाराच्या सुमारास वादळ, सोसाट्याचा वारा सुटला होता. तेव्हा या वादळ वाऱ्यात अचानक घराला आग लागली व जोराचा वारा असल्याने आगीत सर्व संसारोपयोगी साहित्य, घरातील सोयाबीन, तूर, उडीद, ज्वारी, गहू, दाळी, कपडे आदी काही वेळेतच जळुन खाक झाले. तसेच घरासमोर बांधलेल्या दोन म्हशीही आगीत होरपळून जखमी झाल्या आहेत. पत्नी व मुलगा प्राथमिक आरोग्य केंद्र हेर येथे उपचार घेत आहेत. तर म्हशीला पशुपर्यवेक्षक नारायण मुळे यांनी पोपटे यांच्या घरी जाऊन उपचार केला आहे.  

वाचा ः पाच दिवसांचा आठवडा; पण अधिकारी, कर्मचारी येईना वेळेवर

आगीत पोपटे यांचे एकंदरीत तीन लाखांचे  नुकसान झाले आहे. करडखेल येथील पोपटे यांनी  झालेले नुकसान भरपाई मिळावी अशी मागणी केली आहे. करडखेल येथील राजाराम पोपटे यांचे घर रविवारी रात्री वादळात अचानक जळुन खाक झाले. त्यात पत्नी मुक्ताबाई, मुलगा नामदेव व दोन म्हशी भाजले आहेत. घटनास्थळाचा पंचनामा करताना मंडळ अधिकारी पंडीत जाधव, सहायक   अभियंता सतीश जाधव, पशुधन पर्यवेक्षक नारायण मुळे , तलाठी गगाधर जोलापुरे, सरपंच दयानंद कसबे, पोलीस पाटील एकनाथ कसबे, बाबुराव माने, नामदेव बेडगे आदींनी केला. आग नेमकी कशामुळे लागली याचे कारण अघाप समजले नाही.