शेतकरी कुटुंबांनी केली काळ्याआईची पूजा; बैलगाडीतून प्रवास

अविनाश काळे
Tuesday, 12 January 2021

शेत- शिवारात वेळा अमावस्या उत्साहात साजरी करण्यातal आली आहे.

उमरगा: शेतातील उत्पन्नाची समृद्धी आणि भरभराटी होण्याची मनोकामना व्यक्त करत मंगळवारी (ता.१२ ) काळ्याआईची मनोभावे विधीवत पुजा करून असंख्य शेतकरी कुटुंबांनी वेळा अमावस्या उत्साहाने साजरी केली. दरम्यान यंदा रब्बीच्या पेरण्या उशिरा झाल्या तरी पाण्याच्या उपलब्धेतेमुळे पिकांचा बहार आणखी वाढला नाही.

शेतकऱ्यांनी उत्पन्नाची आशा बाळगत पारंपारिक पद्धतीने काळ्याआईची सहकुटुंब पुजाा केली. दुपारी साडेबारानंतर शेतकऱ्यांनी नातेवाईक मित्रपरिवारासह वन भोजनाचा आनंद घेतला. शेती व्यवसाय हा प्रमुख उदरनिर्वाहाचा पर्याय असल्याने शेतीत वर्षभर काबाडकष्ट करून मिळेल तेवढ्या उत्पन्नात समाधानी असलेल्या शेतकरी कुटुंबासाठी वेळा अमावस्याचा सण एक पर्वणीच असते.

यंदा परतीच्या पावसादरम्यान अतिवृष्टीने शेतकऱ्यांची चांगलीच धांदल उडवली होती. परिणामी रब्बीची पेरणी उशीरा सुरू झाली. सध्या काही शिवारात ओलीताखालील पिके बहरात आले असले तरी पिकांवरील किड, अळीचे विघ्न दुर करण्याचा खटापोट करावा लागतोय.

स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा

कोरोनामुळे पहिली ते आठवीच्या शाळांना सुट्टी असल्याने बच्चे कंपनीला शेत- शिवारात मौजमजा करण्याला जणू संधीच मिळाली आहे. अमावस्याच्या पुजेसाठी व विविध खाद्यपदार्थाच्या तयारीसाठी शेतकरी कुटुंबात सोमवारपासुनच (ता.११) तयारी सुरू होती. मंगळवारी सकाळी सहा पासुन ज्वारीच्या पीठ, दह्यापासुन तयार केलेल्या अंबिलाचे मडके घेऊन शेतकरी शेत शिवारात जात असल्याने चित्र दिसत होते.

डोक्यावर घोंगडे पांघरून, अंबिलाच्या मडक्याला कारभारणीचं मंगळसूत्र घालुन पायी चालत शेतकरी पांडव पुजेच्या कोपीत मडकं ठेवतो. आता दळणवळणाची साधने वाढल्याने बऱ्याच शेतकरी कुटुंबातील व्यक्ती मडक्याचा प्रवास वाहनातून करीत असल्याचेही चित्र दिसून आले. बैलांना सजवुन बैलगाडीतुन सहकुटुंब शेताकडे जाण्याची मजा औरच असते. अजुनही बरेच शेतकरी कुटुंब बैलगाडीतुन वेळ अमावस्येला जाण्याची प्रथा कायम ठेवली आहे.

मराठवाड्याच्या आणखी बातम्या वाचा

आता दुचाकी, चारचाकी व ट्रॅक्टरमधुनही शेताकडे शेतकरी कुटुंब जात असल्याचे चित्र दिसून आले. दुपारी बारानंतर शेतकरी कुटुंबांनी पाच पांडवाची विधीवत पुजा केली, त्यानंतर शेतातील ज्वारी, हरभरा पिकावर अंबिल शिंपडण्यात आले. ज्वारी, हरभरा, गहू, करडई पिकाच्या हिरवाईत बच्चे कंपनी मनसोक्त खेळाचा आनंद घेतला. वनभोजनानंतर कडवट- अंबट बोरं, हिरव्या चिंचा आणि मधमाश्यांनी संकलित केलेल्या मकरंदाचा आस्वाद चिमूकल्यांनी घेतला.

वन भोजनाचा घेतला स्वाद-
बाजरीपासुन बनविलेले उंडे, बाजरी व ज्वारीच्या कडक भाकरी तसेच सर्व प्रकारच्या पालेभाज्या, वटाणा, हरभऱ्याचे हिरवे दाणे, बेसन यापासुन बनविलेली भाजी (भज्जी), वांगे, कांद्याची पात व हिरव्या मिरच्यापासुन तयार केलेले भरीत, गव्हाची खीर, कोंदीच्या गोड पोळ्या, आंबट भात (खिचडा) या विविध ताकदवर्धक पदार्थासह अंबिलाचा घोट घेत दुपारी साडेबारानंतर शेत शिवारात वनभोजनाचा शेतकरी कुटुंब व मित्रपरिवारांनी मनसोक्त स्वाद घेतला. 

सिमावर्तीय भागातही वेळा अमावस्या साजरी-
उमरगा तालुका कर्नाटक राज्याच्या सिमेलगत असल्याने बहुतांश सण- उत्सव जवळपास एकसारखे असतात. महाराष्ट्र राज्याच्या सिमेलगत असलेल्या कर्नाटकातील बहुतांश गावात वेळा अमावस्या उत्साहात साजरी करण्यात आली. सिमावर्ती भागातील खजुरी, आणूर, होदलूर, आळंगा, लाडवंती, नंदगुर, रूद्रवाडी, जामगा, हत्तरगा, हिप्परगा आदी भागात वेळ अमावस्या साजरी करण्यात आली.

(edited by- pramod sarawale)
 


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: umarga news farmers celebrating vela amavasya usmanabad