केज - मालवाहू ट्रक, बस, जीप व कार या चार वाहनांचा विचित्र अपघात झाल्याची घटना शनिवारी (ता. ०२) सकाळी साडेदहा वाजण्याच्या सुमारास केज बसस्थानकासमोर घडली. कायम गजबजलेल्या ठिकाणी झालेल्या अपघातात सुदैवाने जिवितहानी टळली..मात्र, कारसह इतर वाहनांचे नुकसान झाले. शहरातील वाहतूक नियंत्रण पुर्णतः कोलमडल्याने अशा अपघाताच्या घटना घडत आहेत. त्यामुळे वाहनधारकांना वाहतूक पोलीसांनी शिस्त लावण्याची मागणी नागरिकांकडून केली जात आहे..राज्य परिवहन महामंडळाची बस बसस्थानकाच्या बाहेर येत असताना समोरून लोखंडी गज वाहतूक करणारा ट्रक भरधाव वेगात आला. ट्रकने समोरील जीपला जोराची धडक दिली. या धडकेने ट्रक अचानक थांबला असता पाठीमागून येणाऱ्या कारची ट्रकला धडक बसली. अपघातात धडक झाल्याने जीप व कारचे मोठे नुकसान झाले असून बसलाही धक्का बसला आहे..अपघातानंतर बसमधील प्रवाशांना सुखरूपपणे बाहेर काढण्यात आले. बसमधील प्रवाशांना कुठलीही दुखापत झालेली नाही. परंतू कार व जीपमधील काही प्रवाशी किरकोळ जखमी झाले आहेत. जखमींना शहरातील उपजिल्हा रुग्णालयात दाखल करून त्यांच्यावर उपचार करण्यात आले..अपघातग्रस्त वाहने बराचवेळ रस्त्यावरच आडवी उभी असल्याने बराचवेळ वाहतुकीची कोंडी झाली होती. हा अपघातात ट्रकचे ब्रेक फेल झाल्याने किंवा चालकाचे वाहनावरील नियंत्रण सुटल्याने झाल्याचा प्राथमिक अंदाज आहे. या प्रकरणी ट्रक चालकाविरोधात केज पोलीस ठाण्यात गुन्हा दाखल करण्यात आला आहे..शहरात वाहन धारकांकडून वाहतूक नियमांचे उल्लंघन, वाहतूक पोलीसांचे होतेय दुर्लक्ष -केज शहरातून खामगाव-पंढरपूर व अहमदपूर-अहिल्यानगर हे दोन राष्ट्रीय महामार्ग जातात. त्यामुळे या रस्त्यावर वाहनांची सारखी वर्दळ असते. मात्र भवानी चौक ते छत्रपती शिवाजी महाराज चौक या अंतरात रस्त्याच्या दुतर्फा दुचाकी व चारचाकी वाहने मनमानीपणे आडवी-तिडवी उभी असतात. त्यामुळे मार्गाने जाणाऱ्या वाहन चालकांना शहरातून बाहेर पडेपर्यंत मोठी कसरत करावी लागत आहे..शहरात झालेल्या अपघातात अनेक जणांना आपला जीव गमवावा लागला आहे तर अनेकांवर अपंगत्वाची वेळ आली आहे. या शहरातील बिघडत चाललेल्या वाहतूक व्यवस्थेकडे वाहतूक पोलीसांनी लक्ष घालून रस्त्यालगत उभ्या असलेल्या वाहनांवर कारवाई करण्याची मागणी नागरिकांकडून केली जात आहे..सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
