Fraud News : मेहुण्याच्या घरावर साल्याचा डल्ला! कंपनीच्या वसुलीचे ४० लाख परस्पर लांबवले

वाळूजमहानगर - वाळूज औद्योगिक वसाहतीतील साजापूर शिवारात असलेल्या स्टील व पाईप कंपनीत काम करणाऱ्याकडे कंपनीच्या मालकांनी ४० लाख रुपयांची रक्कम दिली असता ती त्याने घरात ठेवली होती. त्यानंतर त्याच्या साल्यानेच मेहुण्याच्या घरात डल्ला मारून रक्कम लंपास केली. दरम्यान, वाळूज एमआयडीसी पोलिसांनी मध्यप्रदेशातून दोन आरोपींच्या मुसक्या बांधून त्यांच्या ताब्यातून ४० लाख रुपये व गुन्ह्यात वापरलेला ऐवज जप्त केला.

मुकेश गोयल यांच्या साजापूर शिवारातील स्टील व पाईप कंपनीत श्रीवगतसिंह हिरसिंह राजपूत (४२) काम करतात. ते कुटुंबासह गुरुदक्षिणा अपार्टमेंट बिल्डींग नंबर २, सिडको महानगर -१,तिसगाव येथे राहतात. २० मे २०२३ ते २७ मे २०२३ या कालावधीत कंपनीच्या मालकांनी कंपनीचे वसुलीचे ४० लाख रुपये श्रीवगतसिंह हिरसिंह राजपूत यांच्याकडे दिले होते. ही रक्कम त्यांनी घरी एका बॅगेत ठेवली होती.

दरम्यान २८ मे २०२३ रोजी सकाळी राजपुत व त्याची पत्नी असे भाजीपाला खरेदी करण्यासाठी बाहेर गेले असता त्यांच्या घरी आलेला त्याचा साला दशरथसिंह कांतीसिंह राजपूत याने घरात कोणी नसल्याचा फायदा घेत चाळीस लाख रुपये रक्कम घेऊन पळून गेला. याप्रकरणी दाखल असलेल्या फिर्यादीवरून वाळूज एमआयडीसी पोलीस ठाण्याचे वरिष्ठ पोलीस निरीक्षक अविनाश आघाव यांच्यासह पोलीस पथक नेमून वेळोवेळी मार्गदर्शन करुन गुन्ह्याचा पाठपुरावा केला.

गुप्त बातमीदाराच्या माहितीवरुन मध्यप्रदेश पोलीसांच्या मदतीने पोलीस ठाणे दलौदा (जि.मन्दसौर) येथून गुन्ह्यातील आरोपी दशरथसिंह राजपूत (२६) रा.रामचौक तहसिल राणीवाडा जि.जालौर, राजस्थान व प्रदिपकुमार जगदिश जोशी(२६) रा.गरबा चौक,ता.राणीवाडा जि.जालौर यांना अटक केली.

त्यांच्याकडून चोरलेल्या ४० लाख रुपयांपैकी ३५लाख ८४ हजार रुपये,१ लाख रुपये किंमतीची कार, ३ लाख रुपये सोन्याचे अंगठी व चैन तसेच पाच मोबाईल असा एकुण ४० लाख ७ हजार रुपये किमतीचा मुद्देमाल जप्त करण्यात आला. ही कामगिरी पोलीस निरीक्षक अविनाश आघाव, पोलीस उपनिरीक्षक चेतन ओगले, पोलीस अंमलदार सुरेश कचे, अविनाश ढगे, सूरज अग्रवाल, हनुमान ठोके यांनी केली.