'मुख्यमंत्र्यांनी मराठा आरक्षणाप्रश्नी पंतप्रधान, राष्ट्रपतींकडे बोट दाखवू नये'

बीड: मराठा आरक्षणप्रश्नी मुख्यमंत्री उद्धव ठाकरे यांनी पंतप्रधान नरेंद्र मोदी (narendra modi) किंवा राष्ट्रपतीकडे बोट दाखवून वेळकाढूपणा करू नये, आरक्षणाचा (maratha reservation) विषय निष्क्रियपणे हाताळणाऱ्या अशोक चव्हाण (ashok chavan) यांची मंत्रिमंडळातून हकालपट्टी करावी, अशी मागणी आमदार विनायक मेटे यांच्या नेतृत्वाखालील शिष्टमंडळाने शुक्रवारी (ता. सात) केली.

सर्वोच्च न्यायालयाने मराठा आरक्षण रद्द केल्यानंतर मेटे यांच्या पुढाकाराने येथी काल बैठक झाली. त्यानंतर आज जिल्हाधिकारी रवींद्र जगताप यांच्यामार्फत मुख्यमंत्र्यांना निवेदन देण्यात आले. समाजातील मुलांचे शैक्षणिक, नोकरीसंदर्भातील भविष्य अंधकारमय झाले असून त्याला केवळ आघाडी सरकारचा नाकर्तेपणा कारणीभूत आहे. आरक्षण मिळेपर्यंत आंदोलन व संघर्ष कायम राहील. समाजाला काय आणि कसा न्याय देणार, आरक्षण कसे देणार, सोयी-सवलती काय देणार हे मुख्यमंत्र्यांनी सांगावे, असे निवेदनात म्हटले आहे.

मेटे यांच्यासह सुधीर काकडे, मराठा क्रांती मोर्चाचे समन्वयक बी. बी. जाधव, अॅड. मंगेश पोकळे, गंगाधर काळकुटे, सुहास पाटील, राजेश भुसारी, डॉ. प्रमोद शिंदे, अनिल घुमरे, संजय पवार, मनोज जाधव, अशोक सुखवसे, विनोद कवडे, शेषेराव तांबे, विजय सुपेकर आदी उपस्थित होते.