पतीला वाचविताना पत्नीचा शॉक लागून दुर्दैवी मृत्यू; जालन्यातील घटना

भोकरदन (जालना): घरात पिण्याचे पाणी लागते म्हणून विहिरीवरील विद्युत मोटार चालू करण्यासाठी गेलेल्या पतीला अचानक विजेचा शॉक लागला. हे पत्नीला दिसताच तिने पतीला वाचविण्याचा प्रयत्न केला. मात्र, या घटनेत पत्नीचा शॉक लागून जागीच मृत्यू झाला तर पती गंभीर जखमी झाल्याची घटना शुक्रवारी (ता.27) सकाळी आठ वाजता भोकरदन तालुक्यातील नांजा येथे घडली. सुनीता बाबासाहेब वळेकर (वय 50) असे मयत महिलेचे नाव असून, बाबासाहेब वळेकर वय (56) जखमी आहेत.

मिळालेल्या माहितीनुसार, बाबासाहेब वळेकर हे भोकरदन तालुक्यातील तळणी येथील रहिवासी असून सध्या नांजा गावाजवळील शिरसगाव मंडप शिवारातील शेतात कुटुंबासह ते राहतात. शुक्रवारी सकाळी बाबासाहेब घरात पिण्यासाठी व वापरण्यासाठी पाणी लागते म्हणून त्यांच्या घराजवळील विहिरीवर विद्युत पंप चालू करण्यासाठी गेले असता अचानक त्यांना विजेचा जोरदार शॉक लागला. ते तारांना चिकटले गेले. हे जवळ असलेल्या त्यांच्या पत्नी सुनीता वळेकर यांच्या लक्षात आले. त्यांनी तत्काळ पतीला वाचविण्यासाठी प्रयत्न केले. मात्र, यादरम्यान विजेचा पत्नीलाच जोरदार धक्का लागल्याने त्यांचा जागीच मृत्यू झाला.

पती बाबासाहेब वळेकर गंभीर जखमी झाल्याने त्यांना भोकरदन शहरातील एका खासगी रुग्णालयात उपचारासाठी दाखल करण्यात आल्याचे नातेवाईकांनी सांगितले. मयत सुनीता यांची भोकरदन ग्रामीण रुग्णालयात उत्तरीय तपासणी करून दुपारी त्यांच्या गावी शोकाकुल वातावरणात अंत्यसंस्कार करण्यात आले. या प्रकरणी भोकरदन पोलिसांत आकस्मिक मृत्यूची नोंद घेण्यात आली आहे.