50 लाखांच्या ड्रग्जसह महिलेला अटक; मुंबईत पोलिसांची कारवाई

मुबंई - मुंबईतील एमएचबी पोलिसांनी बोरिवली परिसरातून एका गर्भवती महिलेला 50 लाख 75 हजार किमतीच्या हेरॉईनसह रंगेहात पकडले आहे. मुस्कान दीपक कनोजिया असे आरोपी महिलेचे नाव असून ती २३ वर्षांची आहे. पोलिसांनी तिला अटक केली आहे. घटनेमुळे या परिसरात पोलिस तपासासाठी आणखी सतर्क झाले आहेत.

एमएचबीचे वरिष्ठ पोलिस निरीक्षक सुधीर कुडाळकर यांनी सांगितलेल्या माहितीनुसार, मुंबईतील बोरिवली पश्चिमेकडील सेंट फ्रान्सिस शाळेजवळ एक महिला ड्रग्ज पुरवण्यासाठी येत असल्याची माहिती पोलिसांना मिळाली होती. त्यानुसार माहिती मिळताच एमएचबी पोलिसांच्या पथकाने शाळेजवळ सापळा रचून महिलेला अटक केली आहे. या अटकेनंतर महिलेची चौकशी केली असता, पोलिसांनी तिच्याकडून 345 ग्रॅम, 50 लाख 75 हजारांचे हेरॉईन जप्त करण्यात आले आहे. एमएचबी पोलिसांनी या महिलेला अटक केली असून तिच्या उर्वरित साथीदारांचा शोध सुरू असल्याचे पोलिसांनी सांगितले. या घटनेसंदर्भातील अधिकचा तपास पोलिस करत आहेत.