सलाम ! वय ६२ वर्ष, तरीही रोज उन्हात पनवेल ते वडाळा प्रवास करून करतायत रुग्णसेवा

मुंबई :  कोरोना संसर्गाच्या भीतीने अनेक खासगी डॉक्टरांनी आपले दवाखाने बंद केले. त्यामुळे रुग्णांची फरफट होत आहे; मात्र काही डॉक्टरांनी रुग्णांची निकड लक्षात घेऊन आपले दवाखाने सुरू ठेवले आहेत. डॉ. अरुण मोहिते त्यांच्यापैकी एक डॉक्टर. दररोज पनवेल ते वडाळा असा प्रवास करून रुग्णांना ते मोफत सेवा देत आहेत.

मोठी बातमी - अत्यावश्यक सेवेत असणाऱ्या कर्मचाऱ्यांसाठी लोकल सुरु करा..

कोरोनाच्या भीतीमुळे तसेच अपुऱ्या सुरक्षा साधनांअभावी गल्लोगल्लीतील दवाखाने बंद झाले. त्यामुळे साध्या तापाच्या रुग्णांनाही उपचार मिळणे कठिण होत आहे. त्यामुळे  62 वर्षीय डॉक्टर अरुण मोहिते यांनी आपल्या वयाचा विचार न करता आपला दवाखाना सुरू ठेवण्याचा निर्णय घेतला. मोहिते हे पनवेल जवळील कामोठे या याठिकाणी राहतात; मात्र त्यांचा दवाखाना वडाळ्यात आहे.  दररोज कामोठे ते वडाळा असा 35 किलोमीटरचा प्रवास करत त्यांची वैद्यकीय सेवा सुरू आहे. ते दररोज किमान 22 ते 25 रुग्णांना तपासतात. कामोठे ते वडाळा हे अंतर रोज ते बसने पुर्ण करतात.  

मोठी बातमी -  लॉकडाऊनमध्ये तृतीयपंथीयांची होतेय उपासमार! माय बाप सरकार देईल का लक्ष?

सध्या कोरोनामुळे सर्वच घाबरले आहेत. संस्थेने सांगितल्यामुळे माझाही दवाखाना काही काळ बंद होता; मात्र या सेवा बंद करून कसे चालेल. क्लिनिक बंद होते तेव्हाही मी माझ्या रुग्णाच्या संपर्कात होतो. फोनवरूनच त्यांना आजारावर सल्ले देत होतो. 

इतरांनीही दवाखाने सुरू करावेत

डॉ. अरुण मोहिते यांनी रुग्णालयात येणाऱ्या प्रत्येक रुग्णाला मास्क घालून येणे अनिवार्य  केले आहे. सर्दी, ताप , खोकला असल्याची तक्रार घेऊन अनेक रुग्ण येतात. या सर्वांच्या मनात कोरोनाची भीती असते. अशा रुग्णांची भीती घालवण्यासाठी डॉक्टरची गरज असल्याने मी दररोज क्लिनिकला येतो व पुढेही येत राहणार, असे डाॅ. मोहिते यांनी सांगितले. इतर डाॅक्टरांनीही आपापल्या परिसरात दवाखाने सुरू करावेत, असे आवाहन त्यांनी केले आहे.

62 years old doctor traveling from panvel to wadala for his patients during corona crisis