Mumbai Crime : मुंबईत रिक्षामध्ये महिला प्रवाशावर बलात्कार केल्याप्रकरणी यूपीतून आरोपीला अटक

मुंबई : 20 वर्षीय महिला प्रवाशावर बलात्कार केल्याच्या आरोपाखाली आरे पोलिसांनी 24 वर्षीय रिक्षाचालकाला रविवारी रात्री अटक केली. ही घटना मे महिन्यात घडली होती परंतु महिलेने नुकतीच 6 जुलै रोजी तक्रार दाखल करण्यात आली होती.

गोरेगाव पोलिसांनी तपास सुरू करत रिक्षाचालकाला रविवारी उत्तर प्रदेशामधून अटक केली.इंद्रजित सिंग असे आरोपी रिक्षाचालकाचे नाव आहे. पोलिसांनी दिलेल्या माहितीनुसार, पिडीत तक्रारदार महिला गोरेगाव येथे राहते. बेलापूर येथून 17 मे रोजी ती रिक्षाने गोरेगाव येथे जात होती. रिक्षा आरे जंगलाजवळ निर्जन स्थळी आल्यावर चालकाने लघुशंकेचे निमित्त करून रिक्षा थांबवली.

परिसरात कोणीही नसल्याचे पाहून आरोपीने तरुणीला धाक दाखवून रिक्षाबाहेर नेले आणि तिच्यावर बलात्कार केल्याचा आरोप आहे. त्यानंतर आरोपीने तिला मारहाण केली आणि या घटनेबद्दल कोणाला सांगितल्यास ठार मारण्याची धमकी आरोपीने दिल्याचे पोलीस अधिकाऱ्यांनी सांगितले.

घाबरलेल्या महिलेने याबाबत कोणाकडेही वाच्चता केली नाही. मात्र या घटनेनंतर तिची प्रकृती बिघडली. या घटनेनंतर पीडित महिला मानसिक तणावाखाली होती. तिच्या कुटुंबीयांनी विचारणा केली असता एका रिक्षाचालकाने विनयभंग केल्याचे तिने सांगितले. त्यानंतर पोलीस ठाण्यात तिचे समुपदेशन करण्यात आले. त्यावेळी तिच्यावर झालेल्या बलात्काराबाबतची माहिती तिने दिली. याप्रकरणी 6 जुलै रोजी गुन्हा दाखल करण्यात आला आणि पोलिसांनी रविवारी आरोपीला अटक केली.