सहाय्यक आयुक्त सुजाता पाटील यांना अटक; लाच घेताना रंगेहाथ पकडलं

मुंबई: मेघवाडी विभागाच्या सहाय्यक पोलीस आयुक्त सुजाता पाटील यांच्यावर लाचेची मागणी केल्याप्रकरणी लाचलुचपत प्रतिबंधक विभागात गुन्हा दाखल झाला आहे. एक लाख रुपयांची लाचेची मागणी करुन ४० हजार रुपयांची लाच घेताना ही कारवाई करण्यात आली आहे. कायद्यातील तरतुदीमुळे त्यांच्यावर अटकेची कारवाई झाली नसली तरी शनिवारी त्यांच्यावर ही कारवाई होऊ शकते असे सांगण्यात आले. या कारवाईने पोलीस दलात एकच खळबळ उडाली आहे.

सुजाता पाटील या मेघवाडी विभागाच्या सहाय्यक पोलीस आयुक्तपदी कार्यरत आहेत. यातील तक्रारदाराचा जोगेश्‍वरी परिसरात एक गाळा असून तो गाळा त्यांनी एका महिलेस भाडेतत्त्वावर दिला होता. ५ ऑक्टोंबरला तो गाळा त्यांनी भाडेकरुकडून ताब्यात घेतला होता. मात्र भाडेकरु महिलेसह इतरांनी गाळ्याचे कुलूप तोडून आत प्रवेश केला होता. याबाबत त्यांनी जोगेश्‍वरी पोलिसांत एका महिलेने तिच्याच भाडेकरुविरुद्ध पोलिसांत तक्रार केली होती. मात्र पोलिसांनी त्यांच्या तक्रारीची दखल घेतली नाही. त्यामुळे त्यांनी एसीपी सुजाता पाटील यांची भेट घेऊन त्यांच्याकडे मदत मागितली होती. गाळ्याचा ताबा घेतलेल्या महिलेकडून भविष्यात त्रास होऊ नये म्हणून त्यांनी त्यांच्याकडे एक लाख रुपयांची लाचेची मागणी केली होती. त्यापैकी दहा हजार रुपये त्याच दिवशी घेतले होते. उर्वरित रक्कमेसाठी सुजाता पाटील त्यांच्याकडे तागादा लावत होत्या. त्यामुळे त्यांनी त्यांच्याविरुद्ध लाचलुचपत प्रतिबंधक विभागात तक्रार केली होती. या तक्रारीची शहानिशा केल्यानंतर शुक्रवारी सुजाता पाटील यांना त्यांच्याच कार्यालयात ४० हजार रुपयांचा लाचेचा हप्ता घेताना रंगेहाथ पकडण्यात आले. या कारवाईनंतर त्यांच्या कार्यालयासह घरावर या अधिकार्‍यांनी छापे टाकले होते. या कारवाईचा तपशील समजू शकला नाही. कायद्यातील तरतूदीनुसार रात्री उशिरा कुठल्याही महिलेवर अटकेची कारवाई होत नसल्याने त्यांना नोटीस देऊन सोडून देण्यात आले.

शनिवारी त्यांच्यावर अटकेची कारवाई केली जाईल असे सांगण्यात आले. सुजाता पाटील या वादग्रस्त पोलीस अधिकारी असून यापूर्वी त्यांनी त्यांच्या बदलीबाबत मुख्यमंत्र्यांना पत्र पाठवून आक्षेप घेतला होता. इतकेच नव्हे तर त्यांनी आत्महत्येसह राजीनाम्याची धमकी दिली होती. काही वर्षांपूर्वी त्यांनी अंधेरी रेल्वे स्थानकावर मुजोर रिक्षाचालकाविरुद्ध कारवाई करण्याची मागणी डी. एन नगर पोलिसांकडे केली होती, मात्र पोलिसांनी काहीच कारवाई न केल्याने त्यांनी सेवानिवृत्त झालेल्या एका अधिकार्‍यावर गंभीर आरोप करुन त्यांच्याविरुद्ध वरिष्ठांकडे तक्रार केली होती. मेघवाडी विभागाच्या सहाय्यक पोलीस आयुक्तपदी नियुक्ती झाल्यानंतर त्यांचे एका वरिष्ठ पोलीस निरीक्षकाशी वाद झाला होता. या अधिकार्‍याच्या विरोधातही त्यांनी वरिष्ठांकडे तक्रार केली होती. रेल्वेत कार्यरत असताना ते अनेकदा वरिष्ठ पोलीस निरीक्षकाच्या केबीनमध्ये तासनतास बसून त्यांच्या हाताखालीच पोलीस अधिकारी आणि कर्मचार्‍यांना नाहक त्रास देत होते असाही त्यांच्यावर आरोप झाला होता. अलीकडेच त्यांची मिरा-भाईंदर-वसई-विरार पोलीस मुख्यालयात बदली दाखविण्यात आली होती. मात्र त्या बदलीच्या ठिकाणी रुजू झाल्या नव्हत्या. त्यातच त्यांच्यावर आता लाचप्रकरणी गुन्हा नोंद झाला आहे.