Annu Kapoor : अभिनेते अनु कपूरची ऑनलाईन फसवणूक..

मुंबई : प्रसिद्ध अभिनेते अनु कपूर यांच्यासोबत ऑनलाईन फसवणूक करण्यात आल्याची घटना समोर आली आहे. त्यांच्या बँक खात्यातून सायबर गुन्हेगारांनी लाखो रुपये लंपास केले आहेत. अनु कपूर यांनी यासंदर्भात माहिती ओशिवरा पोलिसांना दिली आहे. अनु कपूर याना एका खाजगी बँकेतून कॉल आला, जिथे त्यांना लिंक केलेले खात्याशी केवायसी अपडेट करण्यास सांगण्यात आले. त्याच दरम्यान त्यांच्या खात्यातून 4.36 लाख रुपये ऑनलाईन लंपास करण्यात आले. पोलीस अधिकाऱ्यांनी अनु कपूर याचा जवाब नोंदवून तपास सुरू केला आहे.

अभिनेत्याची फसवणूक

अनु कपूर यांना बँकेतील एका कर्मचाऱ्याचा गुरुवारी 27 सप्टेंबर रोजी फोन आला होता. बँक कर्मचार्‍याने अनु कपूर यांना केवायसी फॉर्म अपडेट करावा लागेल असे सांगितले. यानंतर अनु कपूर यांनी बँकेचे तपशील त्याच्यासोबत शेअर केले. यासोबतच अनु कपूरने त्याच्यासोबत ओटीपी (वन टाईम पासवर्ड) शेअर केला. त्यानंतर कपूर यांच्या बँक खात्यातून 4.36 लाख रुपये कापले गेले. अनु कपूर यांच्या दोन खात्यांमधून ही रक्कम दोनदा काढली गेली . फसवणूक झाल्याचे लक्षात येताच अनु कपूरने वेळ न घालवता ओशिवरा पोलिसांना माहिती दिली तसेच खाते गोठवण्यासाठी बँकेशी संपर्क साधला. अखेरीस बँकेने अनु कपूर यांची दोन्ही खाती गोठवली आहेत. भारतीय दंड संहिता आणि माहिती तंत्रज्ञान कायद्याच्या तरतुदीनुसार गुन्हा दाखल करण्यात आला आहे. ऑनलाइन फसवणुकीबाबत पोलीस तपास करत आहेत