...अलिबागमध्ये आता बिनधास्त फिरा

अलिबाग : अरबी समुद्राचे सान्निध्य लाभलेले शहर, पर्यटकांसाठीचे नंदनवन अशा बिरूदावली मिरवणाऱ्या अलिबागमधील रहिवासी डासांमुळे हैराण झाले आहेत. या समस्येमुळे संध्याकाळनंतर घराबाहेर पडणेही त्यांना नकोसे होते. या संदर्भातील तक्रारी पालिकेकडे वारंवार केल्या आहेत. त्याची दखल घेत पालिकेने आधुनिक तंत्रज्ञानाचा वापर करून डासनिर्मूलन फवारणी सुरू केली आहे. ‘मॉस्कुटो मिशन’ असा उपक्रम आहे.
 
हे वाचाच : चालाल तर चालाल

जिल्ह्याचे मुख्य ठिकाण असलेल्या अलिबागमध्ये पर्यटकांचाही मोठा राबता असतो. त्यामुळे शहराच्या स्वच्छतेविषयी वारंवार चर्चा होते. काही महिन्यांपासून या शहराला डासांनी त्रस्त केले आहे. रहिवाशांबरोबरच पर्यटकांनीही याबाबत तक्रारी केल्या आहेत. त्यामुळे पालिकेने ही समस्या सोडवण्यासाठी पुढाकार घेतला आहे. त्यानुसार  ‘मॉस्कुटो मिशन’ सुरू केले असून व्हीडीके कंपनीला डास निर्मूलनाचे कंत्राट देण्यात आले आहे. या मोहिमेवर महिन्याला सुमारे तीन लाख रुपये खर्च करण्यात येणार आहे. ही कंत्राटदार कंपनी दोन पद्धतीने शहरामध्ये ठिकठिकाणी फवारणी करणार आहे. डासनिर्मूलनाचे नवीन पद्धतीचे काम प्रायोगिक तत्त्वावर सुरू झाले आहे.

अलिबाग शहरातील डासनिर्मूलनासाठी दर दहा दिवसांनी फवारणीचे काम करण्यात येते. त्यामुळे डासांची अळी वाढण्यावर नियंत्रण ठेवण्यास मदत होणार आहे. या फवारणीचा महिनाभरात परिणाम दिसून येईल. नगराध्यक्ष प्रशांत नाईक, मुख्याधिकारी महेश चौधरी आणि पदाधिकाऱ्यांनी अभ्यास करूनच ही मोहीम हाती घेतली आहे. 
- मानसी म्हात्रे, उपनगराध्यक्षा

शहरातील डासनिर्मूलनासाठी अलिबाग पालिकेने हाती घेतलेला उपक्रम कौतुकास्पद आहे. परंतु या फवारणीचा मानवी आरोग्यावर काही परिणाम होणार नाही ना, याची खात्री पालिकेने करणे आवश्‍यक आहे. शहरातील नागरिकांपर्यंत या उपक्रमाबाबत जनजागृती निर्माण करणे आवश्‍यक आहे. 
तरच ही मोहीम यशस्वी होईल.
- किशोर अनुभवणे, रहिवाशी, अलिबाग

शहरातील डासांवर नियंत्रण ठेवण्यासाठी अलिबाग पालिकेने प्रायोगिक तत्त्वावर आधुनिक साधनसामग्रीच्या आधारे डासफवारणी सुरू केली आहे. महिनाभरात चांगले परिणाम दिसून आल्यास हा उपक्रम पुढेही सुरू ठेवण्यात येणार आहे. 
- महेश चौधरी, मुख्याधिकारी, अलिबाग