Extortion Crime : एकतर्फी प्रेमातून धडा शिकवण्याचा प्रयत्न! व्हिडीओ व्हायरल करण्याची धमकी देवून २३ लाखाची खंडणी केली वसुल

अंधेरी - मित्रासोबतचा अश्‍लील व्हिडीओ सोशल मिडीयावर व्हायरल करण्याची धमकी देऊन अंधेरीत राहणाऱ्या एका ज्युनिअर आर्टिस्ट तरुणीकडून तब्बल २३ लाख रुपयांची खंडणी वसुल करण्याचा प्रकार उघडकीस आला आहे. या टिमोती जॉन फर्नाडिस या कथित प्रियकराला आंबोली पोलिसांनी अटक केली.

एकतर्फी प्रेमातून तरुणीला धडा शिकवणार्‍यासाठी त्याने तिचे फोटोसह व्हिडीओ तिच्या नातेवाईकांना पाठवून तिची बदनामी केल्याचे पोलिस तपासात उघडकीस आले आहे. २६ वर्षाची ही तरुणी ज्युनिअर आर्टिस्ट म्हणून काम करत असून बॉलीवूडमध्ये काम करण्यासाठी तिचे प्रयत्न सुरु आहे.

या दरम्यान तिची टिमोतीशी ओळख झाली होती. ओळखीनंतर या दोघांमध्ये चांगली मैत्री झाली. पिडीत तरुणींचा मॅनेजर म्हणून काम करण्याची इच्छा आरोपीने व्यक्त केली.

या दरम्यान पिडीतेच्या सोशल मिडीया अकाऊंटचे ऍक्सेस आरोपीने मिळवले. तिच्या नावाने एक बोगस इंटाग्राम अकाऊंट उघडले. पिडीतेचा मित्र असलेल्या शाहिदसोबत किसिंगचा अश्‍लील व्हिडीओ तिच्या नातेवाईकांना पाठवला. तो व्हिडीओ व्हायरल करण्याची धमकी दिली. बदनामीच्या भीतीने पिडीतेने आरोपीला २३ लाख रुपये दिले होते. त्यापैकी तिने अठरा लाख कॅश तर पाच लाख रुपये ऑनलाईन ट्रान्स्फर केले होते.

आरोपीने शाहिद सोबतचे संबध तोडून टाकण्यासाठी पिडितेचा मानसिक छळ सुरु केला. मात्र धमकीला भीक न घातल्याने सोशल मिडीयावर पिडितेची कॉलगर्ल म्हणून बदनामी करण्याचा प्रयत्न केला. शेवटी पिडीत तरुणीने आंबोली पोलिसांत तक्रार केली होती. तीन दिवसांपूर्वीच पोलिसांनी अटक केली. याच गुन्ह्यांत आरोपीची पोलीस कोठडी चौकशी सुरु आहे.