सुविधांची वानवा, जंगलातून रस्ता, महिलेची झोळीतच प्रसूती पण अखेर...

भिवंडी : प्राथमिक सुविधांची वानवा असल्यामुळे भिवंडीत एका गरोदर महिलेच्या बाळाचा प्रसुतीदरम्यान मृत्यू झाल्याची हृदयद्रावक घटना घडली आहे. भिवंडी येथील दिघाशी गावातील धर्मीचा पाडा येथे मुख्य रस्त्यापर्यंत येण्यासाठी रस्ता नसल्यामुळे हा प्रकार घडला आहे. दर्शना फेरले असं या महिलेचं नाव असून सुविधांच्या अभावामुळे त्यांना त्यांच्या बाळाला गमवावे लागले आहे.

(Bhivandi Pregnant Women's Newborn Baby Death)

धर्मीचा पाडा येथील दर्शना यांना प्रसूती कळा येऊ लागल्याने त्यांना झोळीतून मुख्य रस्त्यावर आणण्यात आले. झोळीतून घेऊन येतानाचा व्हिडिओ व्हायरल झाला आहे. रस्ता नसल्याने पाण्यातून आणि जंगलातून रस्ता काढत हे गावकरी दर्शना यांना घेऊन जात होते. पण दिघाशी येथील प्राथमिक आरोग्य केंद्र हे धर्मीचा पाडा येथून १ किमी अंतरावर आहे. दरम्यान, दवाखान्यात नेत असतानाच त्यांची रस्त्यातच प्रसूती झाली. त्यांना नंतर दवाखान्यात दाखल करण्यात आले पण तोपर्यंत त्यांचे बाळ दगावले होते. या घटनेनंतर नागरिक आक्रमक झाले असून आम्हाला प्राथमिक सुविधा कधी मिळणार? असा सवाल उपस्थित केला जात आहे.

"आम्हाला प्रत्येक गरोदर महिलेला झोळीतूनच दवाखान्यात न्यावे लागते. कारण आमच्या पाड्यापासून दिघाशीला जाण्यासाठी रस्ता नाही. शासनाने लवकरात लवकर रस्त्याची सोय करून द्यावी" अशी मागणी गावकऱ्यांनी केली आहे. तर "सदर महिलेला ४ दिवसांपूर्वी प्रसूतीसाठी दवाखान्यात भरती करण्यासाठी सांगितलं होतं. पण प्रसुतीनंतर दाखल केल्यानंतर त्यांची प्रकृती स्थिर होती पण बाळाला लवकर सुविधा न मिळाल्याने आणि रस्ता नसल्याने बाळाचा मृत्यू झाला अशी माहिती वज्रेश्वरी प्राथमिक आरोग्य केंद्रातील डॉक्टरांनी दिली.