Thane : गायमुख घाटात विचित्र अपघात; ३ जण जखमी | Sakal
sakal

बोलून बातमी शोधा

Thane : गायमुख घाटात विचित्र अपघात; ३ जण जखमी

Thane : गायमुख घाटात विचित्र अपघात; ३ जण जखमी

ठाणे : ठाण्यातील घोडबंदर रोडवरील गायमुख घाटात झालेल्या विचित्र अपघातात एकाच गाडीत तीन जण अडकून पडले होते. तर या अपघातात पाच गाड्यांचे नुकसान झाले आहे. अडकून पडल्यांमध्ये कार चालक विनोद खरात (३०) यांच्यासह सृष्टी पाटील (१८) आणि पांडुरंग पाटील (४५) या तिघांची जवळपास काही तासांमध्ये सुटका करून त्यांना मीरा भाईंदर येथील खासगी रुग्णालयात उपचारार्थ दाखल केले आहे. ही घटना रविवारी रात्री १०.२० वाजण्याच्या सुमारास घडली आहे. दरम्यान या अपघातात रस्त्यावर ऑइल सांडल्याने वाहतुकीचे तीन तेरा वाजले आहेत.

रविवारी रात्री १०.२० वाजताच्या सुमारास मे पारस पेट्रो प्रा.ली.च्या मालकीचा ऑईलने भरलेला टँकर चालक घेऊन ठाण्याच्या दिशेने येत होता. त्यावेळी अनोखली चालकाचा टँकरवरील ताबा सुटल्यामुळे घोडबंदर कडे जाणाऱ्या एक ट्रकसह तीन चारचाकी वाहनांवर गायमुख घाटात घोडबंदर कडे जाणाऱ्या वाहिनीवर जाऊन आदळला. या अपघातामध्ये एका कारमध्ये तिघे जण अडकून पडले होते. या अपघाताची माहिती मिळताच कासारवडवली पोलिसांसह वाहतूक पोलीस, ठाणे व मीरा भाईंदर या दोन्ही महापालिकांचे अग्निशमन दल आणि प्रादेशिक आपत्ती व्यवस्थापन विभागाने तातडीने घटनास्थळी धाव घेतली.

हेही वाचा: काँग्रेसच्या विनंतीला भाजपाचा मान, राज्यसभा निवडणूक होणार बिनविरोध

तसेच या अपघातात कोणी जखमी झाले आहे का? याची पाहणी केली त्यावेळी एका गाडी तिघे अडकल्याचे समजताच त्यांच्या सुटकेसाठी तातडीने प्रयत्न सुरू केले आणि त्यांची काही तासात यशस्वीपणे सुटका केली. त्या तिघांना गंभीर दुखापत झाली असल्याने उपचारासाठी मीरा भाईंदर येथील भक्ती वेदांत हॉस्पिटल दाखल करण्यात आले आहे. या अपघातात तीन कार, एका ट्रक आणि टँकरचे नुकसान झाले आहे.

यावेळी ठाणे अग्निशमन दलाचे दोन इम्र्जेंसी टेंडर, एक फायर वाहन, एक क्यूआरव्ही, मीरा भाईंदर अग्निशमन दलाचे एक फायर इंजिन, एक क्रेन, तीन हायड्रा, एक जेसीबी, तीन रुग्णवाहिकांना पाचारण केले होते. अशी माहिती आपत्ती व्यवस्थापन विभागाने दिली.

loading image
go to top